Пракурор папярэджвае: жартаваць нельга! :: Хартыя'97 :: Навiны

Гісторыя з выклікам у рэспубліканскую пракуратуру журналіста “Народнай волі” Аляксандра Сіліча ўжо вядомая ўсяму сьвету. Вядомая тым, што сьвет ня ведаў такога: каб за першакрасавіцкі жарт газэтчыка мучылі пракуроры. І вось вынік -- праз тыдзень пасьля першага візыту Сіліча зноў запрасілі наведаць будынак па вул.Рэвалюцыйнай,22. На гэты раз – для ўручэньня афіцыйнага папярэджаньня за подпісам намесьніка Генэральнага пракурора Рэспублікі Беларусь Н.М.Купрыянава.

У дакумэце паведамляецца наступнае:

“У сувязі з зваротам Міністэрства інфармацыі Рэспублікі Беларусь рэспубліканскай пракуратурай дадзены прававы аналіз артыкула “Сегодня ночью Саддам приземлился в Национальном аэропорту “Минск”. Устаноўлена, што ў згаданым друкаваным матэрыяле ў парушэньне арт.40 Закону Рэспублікі Беларусь “Аб друку і іншых сродках масавай інфармацыі”, якая забавязвае журналіста падаваць аб’ектыўную інфармацыю, распаўсюджаныя не адпаведныя рэчаіснасьці зьвесткі аб прыбыцьці ў Рэспубліку Бларусь Садама Хусэйна і прадстаўленьня яму палітычнага прытулку”.

…Згаданая публікацыя насіла характар відавочнай палітычнай правакацыі».

У сувязі з гэтым Аляксандар Сіліч афіцыйна папярэджаны “аб недапушчальнасьці парушэньня патрабаваньняў арт.40 Закону “Аб друку і іншых сродках масавай інфармацыі”. Акрамя таго, пракуратура папярэдзіла, што ў выпадку паўторнага парушэньня патрабаваньняў дадзенага закону адносна журналіста і рэдакцыі “Народнай волі” “будуць прынятыя больш жорсткія меры ўзьдзеяньня, прадугледжаныя Законам Рэспублікі Беларусь “Аб друку і іншых сродках масавай інфармацыі”.