Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Старшыня Аб’яднанай грамадзянскай партыі Анатоль Лябедзька й ягоны намесьнік Яраслаў Раманчук 23 траўня падвергліся вобшуку пры перасячэньні літоўска-беларускай мяжы. Палітыкі вярталіся зь Вільні, дзе яны сустракаліся з прадстаўнікамі Сэйму Літвы. Вобшук праводзілі супрацоўнікі беларускай мытні і цягнуўся ён амаль гадзіну. Была дагледжаная аўтамашына, на якой ехалі лідэры АГП, правяраліся асабістыя рэчы і нават кішэні. Як паведамляе прэс-служба АГП канфіскоўваліся на дасьледаваньне праекты зьменаў у выбарчым заканадаўстве, прашэньні ў Канстытуцыйны суд.
23 траўня ў Гомелі адбылося першае слуханьне аб закрыцьці Гомельскага абласнога грамадзкага аб’яднаньня “Грамадзянскія ініцыятывы”. З зыскам у суд зьвярнулася абласное ўпраўленьне юстыцыі, якое па выніках праверкі абвінаваціла “Грамадзянскія ініцыятывы” ў сыстэматычным парушэньні заканадаўства - няправільным справаводзтве, нямэтавым выкарыстаньні замежнай бязвыплатнай дапамогі, а таксама ў парушэньні статуту арганізацыі, перадае БелаПАН.
У хуткім часе ў Беларусі называцца прэзыдэнтам зможа толькі кіраўнік дзяржавы. Урад выдаў пастанову, паводле якой слова “прэзыдэнт” павінна выключацца зь сьпісу назваў кіраўнікоў арганізацыяў. Зараз прэзыдэнтам банкаў, фірмаў і асацыяцыяў давядзецца пераймяноўвацца ў начальнікаў, кіруючых, дырэктараў, загадчыкаў і старшыняў. Урадавыя чыноўнікі спасылаюцца на даручэньне адміністрацыі кіраўніка дзяржавы. Да 1 жніўня павінны быць падрыхтаваныя неабходныя папраўкі ў заканадаўства.
“Нашая тактыка - не сьпяшацца”, - заявіў старшыня сталай камісіі па міжнародных справах і нацыянальнай бясьпецы “савету рэспублікі” Мікалай Чаргінец, камэнтуючы 23 траўня па просьбе журналістаў сытуацыю з прыняцьцем у Беларусі закону аб упаўнаважаным па правох чалавека й стварэньнем у краіне інстытута амбудсмэна.
Ягонае абраньне адбылося на сёмым чарговым справаздачна-выбарным зьезьдзе, які прайшоў за межамі Менску 24 траўня. Выбары праходзілі на альтэрнатыўнай аснове: акрамя Быкава, на пасаду старшыні арганізацыі прэтэндаваў Віктар Андрэеў - кіраўнік інфармацыйна-прававога цэнтру СПБ Воршы. У выніку таемнага галасаваньня паступіла 38 бюлетэняў. За кандыдатуру Быкава прагаласавалі 24 дэлегаты, за Андрэева – 14, супраць абодвух выказаліся шэсьць чалавек.
Арабская электронная газэта “Алефія” ў панядзелак назвала трох высокапастаўленых ірацкіх вайскоўцаў, якія, на яе думку, былі падкупленыя ЗША і забясьпечылі падзеньне Багдаду і крах рэжыму Садама Хусэйна.
Гістэрыка – вельмі папулярны жанр у маргінальных палітыкаў на постсавецкай прасторы. Сапраўдную палітычную гістэрыку выклікаў тэкст “Лукашэнка стаў у позу”, апублікаваны ў “Известиях” 22 траўня.
Прадстаўнікі Эўрапейскае камісіі асудзілі заяву прэм’ер-міністра Італіі Сільвіа Берлусконі аб магчымым далучэньні Расейскай Фэдэрацыі да Эўрапейскага зьвязу. У Эўракамісіі, якая прадстаўляе інтарэсы ЭЗ ў агуле, упэўненыя, што Расея не адносіцца да ліку дзяржаваў, якія маглі б далучыцца да зьвязу. Такой самай думкі, як перадае AFP, у Эўразьвязе трымаюцца і адносна Ізраілю й Беларусі, якія таксама згадваліся Сільвіа Берлусконі.
Тры чальца адмысловай працоўнай групы Парлямэнцкай асамблеі АБСЭ (ПА АБСЭ) па Беларусі будуць знаходзіцца ў Менску і Гомелі з 25 па 28 траўня. Групу будзе ачольваць Ута Цапф, кіраўнік адмысловай працоўнай групы. Пра гэта АФН паведамілі ў офісе АБСЭ ў Менску.
Візыт дэлегацыі ПА АБСЭ ў Менск не выклікае асаблівага аптымізму ў беларускіх палітычных партыяў. Як паведамілі карэспандэнту “Росбалта” ў прэс-службе Аб’яднанай грамадзянскай партыі (АГП) Беларусі, лідэры беларускіх апазыцыйных партый выпрацавалі агульную пазыцыю адносна надыходзячага візыту. У прыватнасьці, як заявіў старшыня партыі БНФ Вінцук Вячорка, “беларуская апазыцыя выкажа Уце Цапф сваё салідарнае патрабаваньне да эўрапейскіх структураў, уключна АБСЭ, “спыніць аднабаковыя крокі насустрач Менску й дачакацца хаця б аднаго інстытуцыйнага кроку ў адказ”. Лідэр АГП Анатоль Лябедзька таксама лічыць, што “прадэкляраваная міжнароднай супольнасьцю пакрокавая стратэгія засталася на паперы”. “Мы чакаем, што працоўная група ПА АБСЭ будзе ня толькі слухаць, назіраць, але і дасьць прэзэнтацыю свайго пляну дзеяньняў у Беларусь”, - адзначыў Лябедзька.
З 26 траўня па 2 чэрвеня ў Іране будуць праходзіць Дні Беларусі. Гэтыя тэрміны былі пацьверджаныя ў час сустрэчы міністра культуры нашай краіны з надзвычайным і паўнамоцным амбасадарам Ірану ў Беларусі. У Днях культуры прымуць удзел звыш 50 майстраў мастацтваў нашай краіны. У праграму ўключаныя выступ прэзыдэнцкага аркестра Рэспублікі Беларусь і паказ мастацкіх фільмаў “У жніўні 44-га” Міхаіла Пташука і “Маленькі баец” Маргарыты Касымавай. У час знаходжаньня ў Тэгеране дэлегацыі Міністэрства культуры мяркуецца таксама абмеркаваць пытаньне аб магчымасьці падрыхтоўкі праекта пагадненьня аб двухбаковым супрацоўніцтве ў вобласьці культуры паміж Беларусьсю і Іранам.
Амбасадары Вялікабрытаніі, Японіі й Казахстану ўручаць у бліжэйшы час даверчыя граматы Аляксандру Лукашэнку. Пра гэта паведаміў журналістам начальнік упраўленьня інфармацыі, прэс-сакратар беларускага замежнапалітычнага ведамства Андрэй Савіных.
Думскі міжнародны камітэт валодае інфармацыяй аб тым, што Туркмэнія падтрымлівала талібаў у Аўганістане. “ У думскім міжнародным камітэце ёсьць сур’ёзная інфармацыя, якая вельмі насьцярожвае, аб тым, што ў свой час рэжым сп.Туркмэнбашы быў непасрэдна зьвязаны з падтрымкаю талібаў, у тым ліку была перадача паліва талібам як раз напярэдадні контртэрарыстычнай апэрацыі”, -- заявіў кіраўнік міжнароднага камітэту Зьміцер Рагозін.
Дзесяць–дванаццаць гадоў і ўявіць сабе было немагчыма, што Беларусь калі-небудзь будзе межаваць з НАТО. Зараз сытуацыя карэнным чынам зьмянілася. Польшча, Літва й Латвія вось-вось стануць сябрамі НАТО, а значыць, ваенныя базы “патэнцыйнага праціўніка” акажуцца ў непасрэднай блізкасьці ад беларускіх межаў. Зразумела, як гэта ўражвае беларускі ўрад, які ірвецца ў абдымкі Расеі, а ЗША з іх хаўрусьнікамі ледзь не лаюцца, і на беларускіх вайскоўцаў, якія вырасьлі на супрацьстаяньні НАТО.
Беларускія нафтахімічныя прадпрыемствы “ня будуць прадавацца за бясцэнак”, заявіў журналістам віцэ-прэм’ер ураду, міністар эканомікі Беларусі Андрэй Кабякоў, камэнтуючы адсутнасьць заявак патэнцыйных інвэстараў на ўдзел у конкурсе па продажу пакетаў акцыяў прадпрыемстваў галіны.
На дадзены час ў інфэкцыйнай лякарні Горадні на лячэньні знаходзяцца 113 чалавек, хворых на менінгіт. Пра гэта “Интерфаксу” паведаміў у панядзелак галоўны доктар гарадзенскай інфэкцыйнай лякарні Станіслаў Ількевіч. Паводле яго, каля 40 чалавек з дыягназам сярозны менінгіт паступілі ў лякарню за апошнія двое сутак. У асноўным гэта дзеці ад 4 да 12 гадоў.
Выбух курынай псэўдачумы – хвароба Ньюкасла - выяўленая ў Берасьцейскай вобласьці. Здарэньне адбылося ў Малярыцкім раёне. У вёсцы Макраны за некалькі дзён двары засталіся практычна без кур.
У краіне ва ўсю рыхтуюцца да чарговых “Дажынак”. Сёлета яны пройдуць у мястэчку Пружаны, што на Берасьцейшчыне. Зараз раённы цэнтар, які ў час сьвята ўраджаю стане сапраўдным пупом Беларусі, прыбіраюць, фарбуюць, латаюць. Словам, добраўпарадкуюць. Навядзеньне марафету курыруюць з самага верху – з Адміністрацыі прэзыдэнта.
Як паведамілі расейскія інфармацыйныя агенцтвы, прызначаныя на 4-5 чэрвеня таргі па продажу акцыяў найбуйнейшых прадпрыемстваў нафтахіміі Беларусі адмененыя. Адзіная прычына – адсутнасьць жадаючых плаціць вялізныя грошы за часта неэфэктыўна кіруемыя і забясьпечаныя састарэлым абсталяваньнем заводы, і пры гэтым не атрымаць права іх кантраляваць.
Міністэрства адукацыі Беларусі заяўляе, што спробы правесьці ў шэрагу школаў рэспублікі тэстыраваньне дзяцей, якія паступаюць у “нулявую" клясу, незаконнае.
Аркамітэт і прэс-цэнтар Хартыі’97, сябры, блізкія выказваюць спачуваньні каардынатарў грамадзянскай ініцыятывы Хартыя’97 Зьмітру БАНДАРЭНКУ ў сувязі зь сьмерцю маці.
У правілах наведваньня кампутарных клюбаў беларускае сталіцы зьявіліся часовыя абмежаваньні. Зараз інтэрнэтам можна будзе карыстацца толькі пасьля прад’яўленьня пашпарту. Як паведамілі ОНТ у Міністэрстве ўнутраных справаў рэспублікі, новая мера «ўведзеная выключна для тых наведвальнікаў кампутарных клюбаў, якія пьюць, лаюцца і глядзяць порнасайты».
, iнформэр
