Адмысловая працоўная група ПА АБСЭ наведала Менск :: Хартыя'97 :: Навiны

Тры чальца адмысловай працоўнай групы Парлямэнцкай асамблеі АБСЭ (ПА АБСЭ) па Беларусі будуць знаходзіцца ў Менску і Гомелі з 25 па 28 траўня. Групу будзе ачольваць Ута Цапф, кіраўнік адмысловай працоўнай групы. Пра гэта АФН паведамілі ў офісе АБСЭ ў Менску.

“Гэта першы візыт Працоўнай групы з моманту прызнаньня “нацыянальнага сходу” Сталым камітэтам ПА АБСЭ ў Вене ў лютым”, -- заявіла Ута Цапф. - “Мы спадзяемся, што новая сытуацыя дасьць магчымасьць для больш глыбокага супрацоўніцтва паміж Адмысловай групай і беларускімі “парлямэнтарамі” адносна выкананьня крытэрыяў, устаноўленых АБСЭ раней: рэальных функцыяў і паўнамоцтваў парлямэнту, адсутнасьці й дыскрымінацыі палітычнай апазыцыі, свабода прэсы, а таксама доступу апазыцыі да дзяржаўных СМІ і ўнясеньня паправак у Выбарчы кодэкс. Прагрэс у выкананьні гэтых умоваў надзвычай важны ў сьвятле парлямэнцкіх выбараў, заплянаваных на 2004 год”. “Група таксама намерваецца наведаць Гомель з мэтай абмеркаваць зь мясцовымі палітычнымі лідэрамі й прадстаўнікамі грамадзянскай супольнасьці ў вобласьці палітыкі й аховы навакольля”, - дадала Ута Цапф.

У склад дэлегацыі ПА АБСЭ ўваходзяць таксама Урбан Алін (сябра Парлямэнту, Швэцыя) і Фрэд Пансанбі (сябра Парлямэнту, Вялікабрытанія). Дэлегацыю будзе суправаджаць праграмны супрацоўнік ПА АБСЭ Поль Лежандр.

У часе візыту дэлегацыя намерваецца сустрэцца з прадстаўнікамі беларускіх уладаў: міністрам замежных справаў, кіраўніцвам адміністрацыі прэзыдэнта, а таксама з кіраўніком Цэнтральнай выбарчай камісіі, чальцамі абедзьвюх палат “нацыянальнага сходу” і службовымі асобамі з Гомелю.

Дэлегацыя таксама сустрэнецца з апазыцыйнымі палітычнымі партыямі й прадстаўнікамі грамадзянскай супольнасьці, як у Менску, так і Гомелі.