Тэстыраваньне дашкольнікаў незаконнае :: Хартыя'97 :: Навiны

Міністэрства адукацыі Беларусі заяўляе, што спробы правесьці ў шэрагу школаў рэспублікі тэстыраваньне дзяцей, якія паступаюць у “нулявую" клясу, незаконнае.

У Мінадукацыі ОНТ патлумачылі, што травень зьяўляецца самым напружаным месяцам для тых бацькоў, чые дзеці ідуць у “нулёўку”. Кожны жадае аддаць свайго дзіцёнка ў прэстыжную ўстанову. А для таго, каб трапіць у гімназію, трэба прыкласьці максымум намаганьняў. Варта вывучыць зь дзіцёнкам літары, навучыць яго чытаць і, пажадана, не па слагах, разьвіваць лёгіку, вывучаць лічбы, навучыцца лічыць. У інтэрвію ОНТ галоўны інспэктар Мінадукацыі Лілія Кузьняцова заявіла, што афіцыйна тэстыраваньне дашкольнікаў забароненае законам, аднак ёсьць такі панятак, як “дыягностыка дзіцёнка”. Паводле адмыслоўца, дадзены панятак ня мае нічога агульнага з тэстыраваньнем.

Гэтая праверка павінна праводзіцца для высьвятленьня магчымасьцяў дзіцёнка, каб не навучыць яго зноў таму, што дзіцёнак ужо ведае. Праверка можа праводзіцца толькі пасьля залічэньня яго ў школу, але не да таго.

Бацькі ведаюць, што правядзеньне тэстыраваньня ў школах незаконнае, але змагацца з гэтым не жадаюць, апасаючыся абвастрэньня адносінаў з пэдагогамі. Таму яшчэ ў старэйшай групе дзіцячага садку просяць выхавацелек найлепшым чынам падрыхтаваць іх дзяцей да “экзаменаў” у школу.

Нярэдка здараюцца факты, калі да тэстыраваньня рыхтуюцца амаль як у інстытут. Наймаюць рэпетытараў, прыцягваюць “патрэбных людзей” і ўсё гэта для таго, каб трапіць у жаданую школу.

Зьявіўся ў дадзеных мэтах і іншы варыянт. Увайшлі ў моду нядзельныя школы, у якіх дзіцёнка—пяцігодку спрабуюць вучыць таму, што ён будзе вывучаць у нулявой клясе.

Бацькі абураюцца, спрачаюцца, аднак дзяцей у нядзельныя школы прыводзяць. Напэўна хвалююцца, што нягледзячы на супрацьпраўнасьць правядзеньня тэстыраваньня, дзіцёнак застанецца па-за сьценамі школы, якая прыглянулася бацькам.