«Саюзныя грошы» параскрадалі :: Хартыя'97 :: Навiны

Заключэньне Падліковай палаты Расейскай Фэдэрацыі й Камітэту дзяржаўнага кантролю Беларусі па выніках праверкі выкананьня бюджэту “саюзнае дзяржавы” за 2001 год і справаздачы савету міністраў “саюзнае дзяржавы” аб выкананьні згаданага бюджэту зацьверджанае на паседжаньні калегіі Падліковай палаты. Як паказала праверка, з 25 артыкулаў бюджэту ня выканана 6. Даходная частка бюджэту за кошт адлічэньняў дзяржаваў-удзельнікаў, зацьверджаная ў памеры 2,36 млрд. рублёў, выканана на 76,5 адсоткаў і склала 1,8 млрд. руб. Фінансаваньне выдаткаў выканана на 61,7 адсоткаў і склала 1,45 млрд. руб. Сталым камітэтам з спазьненьнем быў сфармаваны рэестар распараджальнікаў і атрымальнікаў сродкаў, што паўплывала на выкананьне бюджэту “саюзнай дзяржавы” за 2001 год. Пра гэта паведамляе ўпраўленьне інфармацыі й грамадзкіх сувязяў Падліковай палаты.

За кошт сродкаў бюджэту, выдаткаваных на ўтрыманьне Сталага Камітэту, каля 0,5 млн. рублёў неабгрунтавана выкарыстоўваліся на правядзеньне мерапрыемстваў, якія павінны былі фінансавацца паводле артыкула “Культура, мастацтва й кінематаграфія”. Пры камандзіроўках за мяжу Дзяржаўнага сакратара Сталага камітэту й ягоных намесьнікаў выплочвалася надбаўка да сутачных і на транспартныя выдаткі, а таксама выдаваліся безсправаздачныя сумы, памер якіх не зацьверджаны органамі “саюзнае дзяржавы”. Усяго згаданыя выдаткі склалі 703,6 тыс. рублёў, у тым ліку сумы, якія не падлягалі справаздачы – 557,1 тыс. рублёў.

Неабгрунтаванае і нямэтавае выкарыстаньне сродкаў бюджэту “саюзнае дзяржавы” ў 2001 годзе склала 37,5 млн. рублёў. У паведамленьні аўдытара Падліковае палаты таксама адзначаецца, што ў часе праверкі выкананьня бюджэту “саюзнае дзяржавы” ў 1999-2000 гадох агульная сума неабгрунтаванага й нямэтавага выкарыстаньня бюджэтных сродкаў складала 132,6 млн. рублёў, зь якіх адноўлена 112,4 млн. рублёў.