Менінгіт перашкодзіў разгляду справы «Ратушы» :: Хартыя'97 :: Навiны

Суд Ленінскага раёну Горадні адклаў на няпэўны тэрмін разгляд справы па скарзе старшыні Гарадзенскага абласнога грамадзкага аб`яднаньня "Ратуша" Алеся Мілінкевіча да адміністратыўнай камісіі. Прычынай адкладу справы зьяўляецца тое, што адказчык па скарзе, прадстаўнік камісіі Ленінскага раёну сп. Радчанка-Юрэчка захварэў на менінгіт, які гэтымі днямі лютуе ў горадзе.

Яшчэ 9 красавіка Алесь Мілінкевіч быў прыцягнуты да адміністратыўнай адказнасьці за парушэньне правілаў уліку і захоўваньня паліграфічнага абсталяваньня (рызографу). Пастанова адміністратыўнай камісіі была
вынесена паўторна за адно і тое ж парушэньне, што і стала прычынай скаргі Мілінкевіча. Рашэньне адміністратыўнай камісіі аб прызнаньні старшыні
"Ратушы" вінаватым стала асноўнай прычынай зыску абласнога упраўленьня юстыцыі аб ліквідацыі абласнога рэсурсавага цэнтру.

Нагадаем, што 22 траўня абласны суд вынес рашэньне аб прыпыненьні справаводзтва па зыску упраўленьня юстыцыі да ўступленьня ў законную сілу рашэньня Ленінскага суда па зыску Мілінкевіча. Такім чынам, лёс “Ратушы” будзе вырашаны толькі пасля таго, як выздаравее і зможа адказваць у судзе прадстаўнік адміністратыўнай камісіі.

Юрыстам праваабарончага цэнтру “Вясна” Юрыю Чавусаву і Уладзімеру Лабковічу, якія меліся прадстаўляць Алеся Мілінкевіча ў судзе, не дазволілі гэта зрабіць – пачаў дзейнічаць Дэкрэт прэзыдэнта №13.