У Барысаве забаронены продаж незалежнай прэсы :: Хартыя'97 :: Навiны

Гарвыканкам Барысаву прыняў рашэньне, якое забараняе з 1 чэрвеня рэалізацыю ў дзяржаўных прадпрыемствах гандлю пэрыядычных выданьняў і кніжнай прадукцыі без адмысловай ліцэнзіі.

Як патлумачыў БелаПАН Анатоль Букас, галоўны рэдактар газэты “Борисовские новости”, з 13,5 тысячаў асобнікаў штотыднёвага накладу гэтага выданьня амаль палова прадавалася ў дзяржаўных крамах, што было зручна і для чытачоў, і рэдакцыі. Такім чынам траплялі да чытача й выпускі іншых выданьняў. Рэдакцыі з кожнага гандлёвага месца сплочвалі ў гарадзкі бюджэт па 70 тысячаў рублёў падаткаў штомесяц. Свой інтарэс мелі ў гэтай “талацэ” і работнікі прадпрыемстваў гандлю, якім да сьціплага заробку прыбаўляліся чвэрць штомесячнага прыбытку ад продажу прэсы.

Намесьнік начальніка Барысаўскай інспэкцыі па падатках і зборах Эдуард Аскерка кажа, што ў ягонай арганізацыі да рэдакцыяў недзяржаўных выданьняў няма прэтэнзіяў. Але парадак ёсьць парадак, і права весьці розьнічны гандаль павінна быць пацьверджаным адпаведнымі ліцэнзіямі. Дзіўна, аднак, зазначыў Э.Аскерка, чаму такі цяглы час кіраўнікі газэтаў іх не атрымалі. У газэтчыкаў свой рэзон – на верхніх паверхах дзяржаўнай улады кажуць пра скарачэньне колькасьці ліцэнзуемых відаў працаў, аб стварэньні аптымальных умоваў для абслугоўваньня грамадзянаў, а мясцовыя органы баяцца нават самую малую частку выпусьціць з-пад свайго пільнага кантролю.

Зараз для афармленьня ліцэнзіі рэдакцыям давядзецца зьбіраць па 20 візаў у кіраўнікоў розных гарвыканкамаўскіх службаў, пры гэтым за кожную заплаціць немлыя грошы. Толькі візіраваньне дакумэнтаў гарадзкім цэнтрам гігіены і эпідэміялёгіі каштуе каля пяцідзесяці тысячаў рублёў, паведаміў Анатоль Букас. А ўсяго, па ягоных падліках, на гэтай працэдуры рэдакцыя “Борисовских новостей” губляе каля шасьцісот даляраў.