Аднавіла выхад «Новая газета Смаргоні» :: Хартыя'97 :: Навiны

Незалежнае выданьне "Новая газета Смаргоні" аднавіла свой выхад у сьвет. Пра гэта паведаміў занавальнік выданьня Рамуальд Улан. Паводле Р.Улана, аднавіць выхад стала магчымым толькі пасьля таго, як удалося знайсьці выдаўца для газэты — ім стала "адна з структураў у Лідзе, якая прасіла сябе не афішаваць, усьведамляючы, што ў ейнай дзейнасьці могуць узьнікнуць праблемы”. Р.Улан спадзяецца, што ў хуткім часе ў якасьці выдаўца газэты зможа выступіць ягоная жонка -- гаспадарчы суд Гарадзенскай вобласьці прыняў рашэньне абавязаць Смаргонскі райвыканкам зарэгістраваць жонку Р.Улана ў якасьці прыватнага прадпрымальніка, што раней выканкам рабіць адмаўляўся.

Першы нумар адноўленага выданьня выйшаў у сьвет 23 траўня, зараз рыхтуецца да выхаду другі. Наклад 16-палоснага выданьня — 5.500 асобнікаў. Зараз газэта будзе распаўсюджвацца без паслугаў Белсаюздруку, праз уласную сыстэму прыватных распаўсюднікаў і альтэрнатыўнай пошты.

Як ужо паведамляў БелаПАН, 25 красавіка Смаргонскі раённы суд фактычна спыніў выхад недзяржаўнай "Новай газеты Смаргоні". У гэты дзень суд прызнаў ранйшых выдаўцоў -- унітарнае прыватнае прадпрыемства "Фермэрская гаспадарка "Колос" — вінаватым у "парушэньні правілаў ажыцьцяўленьня прадпрымальніцкай дзейнасьці” паводле арт. 154 Кодэксу аб адміністратыўных правапарушэньнях. З выдаўца спагнаны штраф у памеры 20 базавых велічыняў (266 тыс. рублей), а таксама ўся сума прыбытку ад рэалізацыі газэты.

Нагадаем, што 26 лютага Гарадзенскі абласны гаспадарчы суд спыніў дзейнасьць прадпрымальніка Рамуальда Улана, выдаўца "Новай газеты Смаргоні" і задаволіў зыск Смаргонскага райвыканкаму. Р.Улана абвінавацілі ў "неаднаразовым парушэньні заканадаўства» і падалі вынікі праверак трох інспэкцыяў – пажарнай, падаткавай і працоўнай. Тады ж новым выдаўцом газэты выступіла фермэрская гаспадарка "Колос".