Прыпыненая справа аб закрыцьці аб’яднаньня «Варута» :: Хартыя'97 :: Навiны

28 траўня Берасьцейскі абласны суд разглядаў справу аб ліквідацыі грамадзкага аб’яднаньня “Агенцтва рэгіянальнага разьвіцьця “Варута” (Баранавічы) і прыняў рашэньне прыпыніць яго па ўзаемнай згодзе бакоў. Істцам у справе выступае ўпраўленьне юстыцыі Берасьцейскага аблвыканкаму.

Як лічыць прадстаўнік упраўленьня Віктар Дзедкаў, некаторыя дакумэнты “Варуты” не адпавядаюць статуту аб’яднаньня, перадае БелаПАН. У прыватнасьці, гэта тычылася назвы аб’яднаньня ў Адзіным дзяржаўным рэгістры юрыдычных асобаў. Ва ўпраўленьні юстыцыі Берасьцейскага аблвыканкаму палічылі, што варта выкарыстоўваць у дакумэнтах зарэгістраванае напісаньне назвы “аб’яднаньне”, а не выкарыстоўваць, як гэта рабіла “Варута”, у назве два слова – то “аб’яднаньне”, то “арганізацыя”.

Судовае паседжаньне цягнулася 15 хвілінаў. Істца хадайнічаў аб прыпыненьні справы на падставе запыту Міністэрства юстыцыі, якое прасіла накіраваць дакумэнты “Варуты” на дадатковы аналіз. Адказчык пагадзіўся. На гэтай падставе судзьдзя вынес рашэньне прыпыніць справу на няпэўны тэрмін.