Скандальная кніга пра Лукашэнку :: Хартыя'97 :: Навiны

У маскоўскім выдавецтве “Яуза” выйшла кніга “Нашествие” з падзагалоўкам “Неизвестная история известного президента”, прысьвечаная гісторыі жыцьця, прыходу да ўлады Аляксандра Лукашэнкі, ажыцьцяўленьню ім сваіх паўнамоцтваў. У кнізе дастаткова рэалістычна апісваецца асоба кіраўніка Беларусі, а таксама падрабязнасьці самых скандальных падзеяў – зьнікненьні палітычных апанэнтаў, гандаль зброяй, непрыгожыя бакі прыватнага жыцьця Лукашэнкі і ягонага атачэньня.

У кнізе “Нашествие” больш за 200 старонак, яна выйшла дастаткова вялікім накладам -- 5000 асобнікаў, аўтар – Уладзімер Мацікевіч. Выдавец паведамляе, што прозьвішча аўтара зьмененае, і што зараз ён жыве за мяжой. Хто гэта такі, адгадаць цяжка. Дэталі беларускага жыцьця ён ведае дастаткова дакладна, хаця і не пазьбегнуў некаторых фактычных памылак у асьвятленьні агульнавядомых падзеяў. Жанр кнігі вызначаны як дакумэнтальна-мастацкая аповесьць, выдавец запэўнівае чытачоў, што ўсе зьвесткі дакладныя, заснаваныя на сьведчаньнях і дакумэнтах. Як вынікае з прадмовы, аўтар “апісвае сацыяльны, палітычны, псыхалягічны фэнамэн асобы Лукашэнкі, асобы, якая няўмольна рушыць да катастрофы”, механізмы дзеяньняў ягонай каманды.

У анатацыі да кнігі адзначаецца, што некалькі гадоў сьледчыя КДБ Беларусі таемна зьбіралі матэрыялы пра жыцьцё й дзейнасьць А.Лукашэнкі, і, рызыкуючы жыцьцём, схавалі дакумэнты аб яго таемных апэрацыях.

Мы не бярэмся меркаваць аб дакладнасьці гэтага твора, а таксама не крытыкуем яго мастація перавагі. Ацаніце самі - http://www.belarusian.com/luka/invasion.htm