Рэкордны ціск на прадпрымальнікаў :: Хартыя'97 :: Навiны

Беларусь “трымае рэкорд па аб’ёмах адміністратыўнага рэгуляваньня прадпрымальніцтва”, што надзвычай блага ўплывае на рэальнае разьвіцьцё прадпрымальніцтва і на міжнародны інвэстыцыйны імідж краіны. Пра гэта на прэс-канфэрэнцыі ў Магілёве пасьля паседжаньня рады рэгіянальных аб’яднаньняў прадпрымальнікаў, заявіў прэзыдэнт Беларускага зьвязу прадпрымальнікаў Аляксандар Патупа. Паводле яго, сытуацыя ў рэспубліцы з разьвіцьцём прадпрымальніцтва “вельмі складаная”.

А.Патупа лічыць, што трэба “накласьці жорсткую забарону на ўсе формы зваротнага дзеяньня любога закону, а таксама прыпыніць любыя несудовыя канфіскацыі ўласнасьці”. “Трэба браць пад жорсткі кантроль правапрымяненьне, бо яно дамінуе над законаўтварэньнем”, - сказаў ён. “Як мага болей законаў павінны быць прамога дзеяньня, каб чыноўнікі не маглі мець магчымасьці тлумачыць законы па сваім гледжаньні”, - адзначыў прэзыдэнт Беларускага зьвязу прадпрымальнікаў.

А.Патупа паведаміў, што ўдзельнікі паседжаньня абмеркавалі праект адкрытага звароту да рэспубліканскіх органаў кіраваньня па праблемах індывідуальных прадпрымальнікаў і ўнесьлі прапановы па спрашчэньні заканадаўства ў сфэры матэрыяльнага забесьпячэньня прадпрымальніцкай дзейнасьці.

Як праінфармавала каардынатар праекту Міжнароднай фінансавай карпарацыі па Магілёўскай вобласьці Тацяна Баранава, на паседжаньні таксама абмяркоўваліся практычныя праблемы індывідуальных прадпрымальнікаў і юрыдычных асобаў, у тым ліку новы праект правілаў гандлю на рынках.

Паводле яе, асаблівая ўвага надзялялася пытаньням прававога забесьпячэньня разьвіцьця дробнага й сярэдняга бізнэсу, апошнім зьменам у заканадаўстве, якія рэгулююць прадпрымальніцкую дзейнасьць.

Акрамя таго, у час паседжаньня абмяркоўваліся практычныя аспэкты матэрыяльнага забесьпячэньня прадпрымальніцкай дзейнасьці. У прыватнасьці, вывад памяшканьняў з жылога фонду, адвод зямельных участкаў, арэнда і продаж памяшканьняў, а таксама мясцовыя падаткі й зборы, удакладніла Т.Баранава.