Лукашэнка ўвёў пасаду зампалітаў на ўсіх прадпрыемствах :: Хартыя'97 :: Навiны

Аляксандар Лукашэнка даў распараджэньне ўвесьці на прадпрыемствах краіны пасаду намесьніка кіраўніка па ідэалягічнай працы -- і ня толькі на дзяржаўных прадпрыемствах. Як паведамляе Расейская служба “Бі-Бі-Сі”, Міністэрства працы й сацыяльнай абароны выслала ў Зьвяз прадпрымальнікаў Беларусі інструкцыю аб службовых абавязках намесьніка кіраўніка па ідэалягічнай працы. Новая пасада ўжо занесеная ў агульнарэспубліканскі рэестар й кваліфікацыйны даведнік.

Прафэсар Аляксандар Патупа, прэзыдэнт беларускага Зьвязу прадпрымальнікаў, заявіў журналістам, што ня можа праігнараваць гэтыя ўказаньні: “Мы фактычна маем магчымасьць паслаць за сьвет і не займацца... гэтай лухтой. Але тым не менш праз гэта нас могуць нейкім чынам зьгарнуць. Гэта вельмі лёкка зараз робіцца”.

“Проста ідзе масавы ідыятызм, прыступ таго, каб пакінуць краіну ў сьмешнае становішча. Ну дзе можна патлумачыць у цывілізаваным сьвеце, што ў розных арганізацыях – гэта маюцца на ўвазе і вытворчыя фірмы, гэтае пытаньне ня толькі ў грамадзкіх арганізацыях -- уводзяцца зампаліты”, - абураўся Патупа.

Згодна інструкцыі Мінпрацы, ад сучаснага зампаліта патрабуецца слушна тлумачыць унутраную й замежную палітыку дзяржавы, аб’ядноўваць работнікаў і выхоўваць у іх пачуцьцё патрыятызму й адказнасьць за лёс краіны. Ён павінен даваць справаздачу кіраўніцтву аб сацыяльна-псыхалягічным клімаце ў калектыве, кантраляваць працу мясцовага радыёвузла, рознага кшталту друку. У інструкцыі не забылі нават пра электроннае табло.

І калі апазыцыя сьцьвярджае, што такім чынам улада робіць больш жорсткім кантроль за грамадзкай дзейнасьцю й сьвядомасьцю напярэдадні магчымага рэфэрэндуму аб падаўжэньні паўнамоцтваў Лукашэнкі, то сам беларускі лідэр намерваецца вырашыць задачу плянэтарнага маштабу, паведамляе Расейская служба “Бі-бі-Сі”. Лукашэнка папікнуў Маскву ў тым, што яна нават не ўсьведамляе неабходнасьці ідэалягічнага выбару і аб’явіў: “Временем, судьбой, ситуацией Беларусь выдвинулась на великую роль духовного лидера восточно-европейской цивилизации”.