Бывай, цэйлонская гарбата? :: Хартыя'97 :: Навiны

Спаганяць новы збор з тых прадпрымальнікаў, чый бізнэс завязаны на афшорных зонах (тэрыторыях, дзе дзейнічаюць падаткавыя льготы і захоўваецца таямніца правядзеньня фінансавых апэрацыяў), у Беларусі пачалі 1 красавіка, калі набраў моц Указ прэзыдэнта №104 “Аб афшорным зборы”. Чамусьці менавіта да Дня сьмеху дзяржава прымеркавала ўвядзеньне падатку. А зараз падрастуць і кошты. У прыватнасьці, пастаўшчыкі цэйлонскае гарбаты (а радзіма любімай беларусамі гарбаты - Шры Ланка - уваходзіць у сьпіс афшорных зонаў, якія абкладаюцца новым зборам) ужо заявілі пра тое, што ўхвалёнае жаданьне папоўніць бюджэт узьляжа, як звычайна, на плечы куплянікаў.

Як вядома, большасьць гарбаты ў сьвеце вырабляецца менавіта шры-ланкійскімі кампаніямі. І ў беларускіх пастаўшчыкоў цэйлонскай гарбаты ёсьць некалькі варыянтаў перажыць новы збор. Па-першае, проста адмовіцца весьці бізнэс з Шры-Ланкой і саступіць месца на рынку расейскім кампаніям, якія, між іншым, такімі зборамі пры закупцы тавараў з афшорных зонаў не абкладаюцца. Па-другое, падвысіць кошты... Ня выключана, што для таго, каб пазьбегнуць росту коштаў, для ўвозу цэйлонскай гарбаты ў Беларусь будуць знойдзеныя абхадныя шляхі. Пакуль кошты на папулярныя гатункі завезенай гарбаты не зьмяніліся.

Тавары зь якіх краінаў могуць падаражэць?

У сьпісе афшорных зон, які прыкладаецца да ўказу “Аб афшорным зборы”, 47 пунктаў. Акрамя Шры-Ланкі зборам будуць абкладацца тыя прадпрымальнікі, якія ўвозяць тавары з Ірляндыі (Дублін і Шэнан), Ганконгу, Аб’яднаных Арабскіх Эміратаў (Дубаі), некаторых кантонаў Швайцарыі, з Чарнагорыі, з партугальскае выспы Мадэйра і нават з назраньскага Цэнтра міжнароднага бізнэсу «Інгушэція». Цяжка казаць пра інгушэцкія тавары, але ірляндзкімі віскі й ганконгскімі красоўкамі, напэўна, варта прызапасіцца.