Эўразьвяз закляпочаны станам свабоды слова ў Беларусі :: Хартыя'97 :: Навiны

Эўрапейскі Зьвяз выказаў глыбокую закляпочанасць адносна прыпыненьня дзейнасьці «Белорусской деловой газеты» і яе дадатку «БДГ. Для служебного пользования». «Мы засмучаныя адсутнасьцю прагрэсу ў заканадаўстве аб СМІ. А таксама няспынным ціскам у Беларусі на незалежныя і апазыцыйныя газэты й журналістаў. Гэтыя падзеі асабліва бянтэжаць у сьвятле шматабяцанага супрацоўніцтва, якое мела месца паміж АБСЭ і Беларусьсю з моманту адрыцьця офісу АБСЭ ў Менску», -- гаворыцца ў заяве ЭЗ. Такім чынам, лічаць прадстаўнікі краінаў-сябраў Эўразьвязу, Беларусь парушае ўзятыя на сябе забавязкі перад АБСЭ па свабодзе СМІ. Прапануем Вашай увазе тэкст заявы Эўразвязу цалкам.

«Эўрапейскі Зьвяз выказвае глыбокую закляпочанасьць адносна фактаў прыпыненьня дзейнасьці «Белорусской деловой газеты» і яе дадатку «БДГ. Для служебного пользования». Такое рашэньне было прынятае 2 траўня за публікацыю матэрыялу, які, як сьцьвярджаюць беларускія ўлады, дыскрэдытуе гонар і годнасьць Лукашэнкі і ўводзіць грамадзянаў у зман.

Як слушна адзначылі прадстаўнік АБСЭ па свабодзе СМІ і Офіс АБСЭ ў Менску, дадзеныя факты сьведчаць аб кампаніі перасьледу незалежных СМІ ў Беларусі. Гэтым інцыдэнтам папярэднічалі папярэджаньні ў адрас такіх незалежных газэтаў, як “Народная воля”, “Навінкі” і “Вечерний Столин”, а таксама цяглае заключэньне рэдактара незалежнай газэты “Рабочы”. Мы, як і прадстаўнікі працоўнае групы ПА АБСЭ, якія наведалі краіну на мінулым тыдні, засмучаныя адсутнасьцю прагрэсу ў заканадаўстве аб СМІ, а таксама няспынным ціскам на незалежныя і апазыцыйныя газэты й журналістаў.

Гэтыя падзеі асабліва бянтэжаць у сьвятле шматабяцанага супрацоўніцтва, якое мела месца паміж АБСЭ і Беларусьсю з моманту адкрыцьця офісу АБСЭ ў Менску. На думку ЭЗ, Беларусь парушае ўзятыя на сябе забавязкі перад АБСЭ па свабодзе СМІ.

Улічваючы ўсё вышэйзгаданае, ЭЗ заклікае Беларусь прыняць меры для зьмены законапраекта аб СМІ з улікам вынікаў ацэнкі сытуацыі АБСЭ і Радай Эўропы. ЭЗ таксама заклікае беларускія ўлады прыняць неадкладныя, зваротныя дзеяньні па аднаўленьні выхаду ў друк «БДГ» і яе дадатку, а таксама ўстрымацца надалей ад перасьледу назалежных СМІ ці журналістаў у Беларусі. Мы спадзяемся, што беларускія ўлады неадкладна адкажуць на просьбу прадстаўніка па СМІ і патлумачаць сытуацыю, якая склалася вакол закрыцьця гэтых выданьняў.

ЭЗ працягвае спадзявацца, што аднойчы Беларусь зойме сваё месца ў Эўропе, як краіна з рэальна функцыянуючымі дэмакратычнымі інстытутамі і квітнеючай рынкавай эканомікай. Дзеяньні кшталту закрыцьця й перасьледу НДА і грамадзянскай супольнасьці ідуць насуперак гэтай мэты.

Далучаныя дзяржавы Кіпр, Чэхія, Эстонія, Вэнгрыя, Латвія, Мальта, Польшча, Славакія й Славенія, а таксама асацыяваныя краіны Баўгарыя, Румынія й Турцыя далучаюцца да гэтай заявы».