Бацькі ліцэістаў рыхтуюцца да вулічных акцыяў :: Хартыя'97 :: Навiны

Сытуацыя, якая склалася вакол Нацыянальнага гуманітарнага ліцэю імя Я.Коласа, сёньня можа зьмяніцца. Кіраўнікоў ліцэю — Уладзімера Коласа і ягоных намесьнікаў Лявона Баршчэўскага і Ірыну Сідарэнку — выклікаў на размову намесьнік міністра адукацыі Казімір Фарына. Сустрэча зь намесьнікам міністра адбудзецца а 16-й гадзіне.

Выкладчыкі накіравалі заяву на імя міністра адукацыі Пятра Брыгадзіна. Яны папрасілі зьняць з пасады дырэктаркі Тамару Шчэрбачэвіч. Выкладчыкі спаслаліся на тое, што новая дырэктарка не валодае беларускай мовай (а ў статуце ліцэю напісана, што працоўная мова выключна беларуская).

Акрамя таго, паводле выкладчыкаў, новая дырэктарка ня мае ніякага ўяўленьня пра мэтодыкі выкладаньня і арганізацыю навучальнага працэсу. Тое, што прызначаная кіраўніца навучальнай установы праігнаравала ўсе запрашэньні на бацькоўскі сход і сход навучэнцаў, на думку настаўнікаў, таксама сьведчыць аб прафэсійнай некампэтэнтнасьці гэтай асобы. Настаўнікі даслалі лісты кіраўніку адміністрацыі Лукашэнкі Ўралу Латыпаву і віцэ-прэм’еру Ўладзімеру Дражыну. Іх запрасілі наведаць ліцэй, каб на месцы высьветліць сытуацыю.

Бацькі амаль штодня праводзілі сходы. Яны даслалі заяву-ўльтыматум міністру адукацыі, каб той неадкладна вырашыў пытаньне. Дэлегаты ад бацькоў наведалі міністра Пятра Брыгадзіна, і ён ім паабяцаў, што прыме рашэньне. Але дагэтуль невядома — якое.

Дарэчы, бацькі самыя актыўныя ўдзельнікі падзеяў. Яны папрасілі дзяцей устрымацца ад вулічных акцыяў і засяродзіцца на здачы іспытаў. Самі ж падалі заяўку ў Менгарвыканкам, каб атрымаць дазвол на правядзеньне васьмі пікетаў: дзвюх — ля будынку Міністэрства адукацыі, астатнія — недалёка ад ліцэю.

Чакаецца, што сёньня пасьля размовы з намесьнікам міністра сытуацыя зьменіцца. Бацькі а 6-й вечара зьбяруцца на сход. Яны маюць рашучы настрой. Калі высьветліцца, што кіраўнікам ліцэю прапанавалі звольніцца альбо іх папярэдзілі, што ў любым выпадку новая дырэктарка застанецца на сваёй пасадзе, бацькі, магчыма, ня стануць чакаць адказу Менгарвыканкаму і выйдуць на вулічныя акцыі.

Дарэчы, сёньня ліцэісты таксама прыйдуць увечары ў ліцэй. Пакуль яны пагаджаюцца ўстрымацца ад радыкальных учынкаў, але ўсё будзе залежаць ад таго, якую інфармацыю яны атрымаюць сёньня. Абураныя дзеці могуць выйсьці з-пад кантролю дарослых.

Пра разьвіцьцё падзеяў можна прачытаць на нашым сайце ў панядзелак.

ddddd