Валеры Дранчук: абаронім прыродныя каштоўнасьці Беларусі! :: Хартыя'97 :: Навiны

У інтэрвію БелаПАН адзін з заснавальнікаў дэмакратычнага блёку “Свабодная Беларусь”, вядомы эколяг Валеры Дранчук заклікае актыўна далучацца да руху рэгіёну краіны, “прирастать лесами и болотами”, каб абараніць прыродныя каштоўнасьці Беларусі ад дэградацыі й прамысловага зьнішчэньня скаардынаванымі, сумеснымі дзеяньнямі”.

В.Дранчук лічыць, што ў абароне прыроднага багацьця Беларусі “кропкай адліку сёньня зьяўляецца Белавеская пушча, дзе пануючы рэжым стварыў выключна абуральны прэцэдэнт валюнтарысцкага гаспадараньня на запаведнай тэрыторыі й свавольства ў абыходжаньні з жыхарамі пушчы”. Эколяг падкрэсьліў, што “людзі не пакарыліся, а спрабуюць абараніцца”.

5 чэрвеня, у Усясьветны дзень аховы навакольля, В.Дранчук уручыў адпаведным органам калектыўны ліст жыхароў пушчы, які падпісалі больш за 200 чалавек. У звароце яны патрабуюць ад Аляксандра Лукашэнкі, “нацыянальнага сходу” і ўраду краіны праверкі й дасьледаваньня ўмоваў, ад якіх залежыць захаваньне Белавескай пушчы, заяўляюць аб “незвычайным ціску на свае сацыяльныя й грамадзянскія правы”.

“Распаўсюджваючы гэты дакумэнт, мы апелюем да міжнародных нормаў і стандартаў экалягічнага права, якія абавязаная выконваць Беларусь”, – падкрэсьліў В.Дранчук.

4 чэрвеня 2003 году ў Менске быў створаны дэмакратычны блёк "Свабодная Беларусь", мэта дзейнасьці якога - прыход дэмакратычных сілаў да кіраваньня краінай праз выбары. У раду блёку ўвайшлі прадпрымальнік Леанід Малахаў, дэпутат Вярхоўнага Савету 13-га скліканьня Валеры Шчукін, дыплямат Андрэй Саньнікаў, рэжысэр Юры Хашчавацкі, журналіст і эколяг Валеры Дранчук, адзін зь лідэраў дэмакратычнай апазыцыі г.Барысава Зьміцер Бародка, жонка зьніклага прадпрымальніка Анатоля Красоўскага Ірына Красоўская.