«Нячэсных» не пушчаць! :: Хартыя'97 :: Навiны

Беспрэцэдэнтнае хадайніцтва высунулі ў чацьвер прадстаўнікі Пракуратуры РБ на працэсе па справе былога генэральнага дырэктара ВА "МТЗ" Міхаіла Лявонава, якое заслухоўваецца ў Вярхоўным судзе Беларусі. Спасылаючыся на ліст міністра інфармацыі Міхаіла Падгайнага, абвінавачваньне патрабавала пазбавіць акрэдытацыі на судовых паседжаньнях журналістаў “БДГ “ і “Народнай волі”.

Паводле адвакатаў Міхаіла Лявонава, у іх практыцы гэта першы такі выпадак. Аднак нумар не прайшоў.

Суд разгледзіў заяўленае хадайніцтва па сутнасьці і вырашыў, што для яго задавальненьня няма падставаў, і патрабаваньне пракуратуры было адмененае. Такім чынам, суд даў зразумець, што парушэньня Закону “Аб друку і іншых СМІ” з боку журналістаў “БДГ” і газэты “Народная воля” пры асьвятленьні ходу працэсу не было.

На думку пракуратуры, журналісты газэтаў без дазволу судзьдзі агучылі матэрыялы крымінальнай справы, і міністар інфармацыі з гэтым пагаджаецца. Хаця, падавалася б, каму як не Падгайнаму трэба бало б ведаць, што пракуратура зьяўляецца ўдзельнікам працэсу па “справе Лявонава” (асобай зацікаўленай), а зусім не кіруе ім. Калі насамрэч мела месца парушэньне закону, то прадстаўленьне павінен быў пісаць старшынёвы судзьдзя Міхаіл Кашко, бо, згодна арт.290 УПК РБ, менаівта ён кіруе працэсам. Аднак судзьдзя ў Міністэрства інфармацыі з прэтэнзіямі не зьвяртаўся, дый і ня мог зьвяртацца, бо ён забавязаны забясьпечваць роўнасьць у правох бакоў на працэсе. Таму калі ў прэсе адлюстроўваецца думка абвінавачваньня, то ёсьць права на тое, каб адлюстроўваць і думку супрацьлеглага боку -- абвінавачанага.