«Навінкі» абскардзяць рашэньне аб прыпыненьні выхаду :: Хартыя'97 :: Навiны

Рэдакцыя газэты “Навінкі” намерваецца абскардізць рашэньне аб прыпыненьні выхаду выданьня. Пра гэта паведаміў БелаПАН рэдактар газэты Павал Канавальчык. Нагадаем, што 20 траўня суд Маскоўскага раёну Менску аштрафаваў Канавальчыка на 100 базавых адзінак (каля 700 даляраў ЗША) за “распаўсюд наўмысна ілжывых зьвестак, якія ганьбяць гонар і годнасьць прэзыдэнта Рэспублікі Беларусь”. 21 і 22 траўня рэдакцыя атрымала адразу два папярэджаньня Міністэрства інфармацыі за парушэньне арт.5 Закону аб друку.

Тым не менш, як адзначае П.Канавальчык, рэдакцыя не губляла надзею на вырашэньне канфлікту й працавала ў звычайным рэжыме. Наступны нумар газэты быў надрукаваны на паліграфічнай фабрыцы “Чырвоная зорка” і ўзяты на экспэдыцыю “Белсаюздрукам”. Аднак, паводле рэдактара газэты, “пазьней мы даведаліся, што “Белсаюздрук” адмаўляецца рэалізоўваць гэты нумар, спасылаючыся на пэўнае “прадпісаньне” зь Міністэрства інфармацыі. Як высьветлілася пазьней, за некалькі дзён да гэтага, міністэрства прыняла рашэньне аб часовым спыненьні выхаду газэты “Навінкі” тэрмінам на 3 месяцы, якое было дасланае ў адрас рэдакцыі толькі 2 чэрвеня”. Паводле П.Канавальчыка, у выніку “рэдакцыя панесла матэрыяльныя выдаткі, бо ўвесь наклад нумара аказаўся недаступным чытачам і няма магчымасьці яго рэалізаваць”.

Рэдакцыя газэты зьбіраецца ў судовым парадку абскардзіць рашэньне Міністэрства інфармацыі.