«Intex-press» ня хочуць распаўсюджваць :: Хартыя'97 :: Навiны

Выдавецкі дом "Intex-press" у Баранавічах нечакана сутыкнуўся з праблемай распаўсюду чарговага нумару свайго аднайменнага выданьня. За пяць дзён (з 5-га да 10-га чэрвеня) газэту "Intex-press" адмовіліся прадаваць 12 гандлёвых кропак, з якімі ў рэдакцыі былі падпісаныя адпаведныя дамовы.

Сярод установаў, якія адмовіліся распаўсюджваць газэту, ёсьць як дзяржаўныя, так і недзяржаўныя гандлёвыя кропкі. Тлумачыць прычыны свайго раптоўнага рашэньня яны адмаўляюцца. Паводле неафіцыйных зьвестках, з гарадзкога выканаўчага камітэту паступіла тэлефоннае распараджэньне з пагрозаю стварыць перашкоды пры перарэгістрацыі прыватных прадпрыемстваў, калі тыя будуць і далей распаўсюджваць газэту. У некаторых выпадках канфлікт паміж распаўсюднікамі й газэтай удалося залагодзіць, бо паводле закону падпісанты дамовы павінны папярэдзіць пра яе скасаваньне ня менш як за месяц.

Газэта "Intex-press" выдаецца ў Баранавічах накладам 15.500 асобнікаў: гэта больш, чым у дзяржаўнай раённай газеты "Наш край". У выніку нечаканага канфлікту рэдакцыі не ўдалося рэалізаваць каля 500 асобнікаў выданьня, кожны зь якіх каштуе 400 рублёў; такім чынам, на страты рэдакцыі ўжо склалі каля 200 тысячаў рублёў. Па падліках генэральнага дырэктара выдавецкага дому Уладзімера Янукевіча, калі гандлёвыя кропкі і надалей будуць адмаўляцца прымаць выданьне на распаўсюд, нерэалізаваным можа застацца да 48% накладу газэты. Калі ў бліжэйшы час выправіць сытуацыю не атрымаецца, У. Янукевіч зьбіраецца зьвярнуцца ў суд. Пакуль жа рэдакцыя рыхтуе да выпуску чарговы нумар "Intex-press", які мае пабачыць сьвет 12-га чэрвеня.