Да выдачы -- 94.000 рублёў :: Хартыя'97 :: Навiны

Гэты разьліковы лісток мы папрасілі ў акадэміка Нацыянальнай Акадэміі навук Рэспублікі Беларусь Генадзя Міхайлавіча Лыча. Былы дырэктар Інстытута эканомікі зараз зьяўляецца галоўным навуковым супрацоўнкам. У чалавека за плячыма багацейшы доьсвед, яго энэргіі могуць пазайздросьціць нават маладыя. А што ён зарабляе?

Чытаем апошні радок: "К выдаче -- 94.000". І ў аванс было 100.000. Хіба сёньня гэта грошы? Тым больш для акадэміка. На Захадзе людзі такога ўзроўню маюць у дзясяткі разоў болей. А ўлады зьдзіўляюцца: "Чаму навукоўцы пакідаюць Беларусь?" Адказ зразумелы нават дурню.

Дзеля справядлівасьці адзначым: навукоўцам Акадэміі 3-4 разы ў год аказваецца так званая матэрыяльная дапамога. Якая? “А было, калі яе памер складаў усяго сем тысячаў рублёў”, – кажа Генадзь Міхайлавіч. Як гаворыцца, курам на сьмех!

Яшчэ ёсьць якаяйсьці даплата за званьне акадэміка, член-карэспандэнта. Але тут ужо як Бог пашле. Такім вядомым людзям, як Станіслаў Шушкевіч і Іван Нікітчанка, увогуле адмовілі. А Генадзю Міхайлавічу Лычу і ягоным калегам з Акадэміі раз на год падкінуць дзевяць мінімалак – і будзь здаровы.

Не расьце, а падае прэстыж беларускай навукі. І гэта зразумела – хто будзе сушыць мазгі пры такой аплаце высокакваліфікаванай працы.