У Жэневе будуць заслухоўваць «беларускае прафсаюзнае пытаньне» :: Хартыя'97 :: Навiны

12 чэрвеня ў рамках сэсіі Міжнароднай канфэрэнцыі працы, што праходзіць у Жэневе, плянуецца разгляд сытуацыі з захаваньнем правоў прафсаюзаў у Жэневе.

91-ая сэсія Міжнароднай канфэрэнцыі працы (МАП) праходзіць з 3 па 19 чэрвеня. Дэлегаты, сярод якіх -- міністры працы, лідэры арганізацыяў працоўных і працадаўцаў з большасьці дзяржаваў-сябраў МАП, -- абмяркоўваюць пытаньні барацьбы зь беднасьцю ва ўсім сьвеце. Новыя формы й мэтады павышэньня бясьпекі працы, выкараненьня прымусовай працы, барацьбы з дыскрымінацыяй на працоўным месцы й многія іншыя.

Разгляд “беларускага пытаньня” заплянаваны ў рамках справы №2090 -- аб парушэньні ўрадам Рэспублікі Беларусь прынцыпаў свабоды аб’яднаньняў, паведаміў БелаПАН лідэр беларускага прафсаюзу работнікаў радыёэлектроннай прамысловасьці Генадзь Фядыніч, які прымае ўдзел у працы сэсіі. Справа была заведзеная кіраўніцтвам Міжнароднай арганізацыі працы на падставе скаргі, якую 16 чэрвеня 2000 году накіравалі ў МАП чатыры арганізацыі – рэспубліканскія прафсаюзы работнікаў аўтамабільнага й сельскагаспадарчага машынабудаваньня, аграпрамысловага комплексу, радыёэлектроннай прамысловасьці, а таксама Беларускі кангрэс дэмакратычных прафсаюзаў.

Кіраўніцтва МАП разгледзіла скаргу і вынесла беларускаму ўраду сьпіс рэкамэндацыяў. У склад афіцыйнай беларускай дэлегацыі на цяперашняй сэсіі ўваходзяць міністар працы й сацыяльнай абароны Антаніна Морава, старшыня Фэдэрацыі прафсаюзаў Беларусі Леанід Козік і намесьнік кіраўніка Беларускай канфэдэрацыі прамыслоўцаў і прадпрымальнікаў Валеры Шашкоў. Апрача афіцыйнай дэлегацыі, у Жэневе па запрашэньні Міжнароднай канфэдэрацыі свабодных прафсаюзаў знаходзяцца Генадзь Фядыніч і прэзыдэнт Беларускага кангрэсу дэмакратычных прафсаюзаў Аляксандар Ярашук.