За што пакутаваў Леанід Калугін? :: Хартыя'97 :: Навiны

Былы генэральны дырэктар ЗАТ “Атлант” Леанід Калугін рашэньнем суда Цэнтральнага раёну Менску вызвалены ад адказнасьці ў адпаведнасьці з “Законам аб амністыі”. Мера стрыманьня ў выглядзе падпіскі аб нявыезьдзе зь Леаніда Калугіна была сёньня зьнятая. За што тады 62-гадовы дырэктар калісьці самага пасьпяховага й рэнтабельнага беларускага прадпрыемства пазбавіўся працы, здароўя, правёў каля паўгода ў турме і нават пабываў у псыхіятрычным шпіталі “Навінкі” застаецца загадкай.

Крымінальная справа Леаніда Калугіна – адна з шэрагу гучных справаў адносна прадстаўнікоў дырэктарскага корпусу. Леанід Калугін быў затрыманы работнікамі ўпраўленьня Дэпартамэнту фінансавых расьсьледаваньняў па Менскай вобласьці і Менску 21 лістапада 2001 года. У той жа дзень вызвалены ад займаемай пасады. З гэтай падзеяй практычна супаў па часе арышт дырэктара МТЗ Міхаіла Лявонава. У той самы час была заведзеная справа супраць былога начальніка Беларускай чыгункі Віктара Рахманько.

У турме Калугін правёў каля паўгода, прайшоў прымусовую экспэртызу ў псыхіятрычным шпіталі. Затым мера стрыманьня была замененая падпіскай аб нявыезьдзе.

Калугіна абвінавачвалі па трох артыкулах Крымінальнага кодэксу. У прыватнасьці, ён абвінавачваўся ў злоўжываньні службовым становішчам, незаконнай прадпрымальніцкай дзейнасьці і невяртаньні валютных сродкаў з-за мяжы. Дырэктару заводу лядоўняў пагражала пазбаўленьне волі тэрмінам да 8 гадоў і канфіскацыя маёмасьці.

Аднак на судзе прадстаўнік пракуратуры адмовіўся падтрымліваць абвінавачваньні Калугіна па шэрагу эпізодаў справы, па астатніх прасіў суд вызваліць яго ад адказнасьці ў адпаведнасьці з “Законам аб амністыі”. Сам Леанід Калугін з гэтым не пагаджаўся. Ён прасіў суд апраўдаць яго па ўсіх абвінавачваньнях як невіноўнага.

Працэс па справе Леаніда Калугіна цягнуўся больш за месяц і, на думку адвакатаў падсуднага, паказаў безпадстаўнасьць абвінавачваньняў. У дадзенай сытуацыі ёсьць верагодным узьнікненьне пытаньня аб адказнасьці сьледчых Дзяржкантролю за незаконнае затрыманьне былога дырэктара заводу лядоўняў. Аднак, як паведаміў прэс-цэнтру Хартыі адвакат Леаніда Калугіна Аляксандар Пыльчанка, пакуль пытаньне так не стаіць.

Варта нагадаць, што ў “справы Леаніда Калугіна” быў і палітычны аспэкт -- летам 2001г. ён заявіў пра свой намер удзельнічаць у прэзыдэнцкіх выбарах, аднак не набраў патрэбнай колькасьці галасоў для рэгістрацыі ў якасьці кандыдата. Зараз, пасля паўтара года знаходжаньня пад сьледзтвам, Калугіну і ў галаву не прыйдзе паўтарыць такое...