Вынясеньне прысуду Калугіну перанесена на 12 чэрвеня :: Хартыя'97 :: Навiны

Прысуд па справе былога генэральнага дырэктара ЗАТ “Атлант” Леаніда Калугіна суд Цэнтральнага раёну Менску вынясе 12 чэрвеня а 14.00.

Леанід Калугін быў затрыманы работнікамі ўпраўленьня Дэпартамэнту фінансавых расьледаваньняў па Менскай вобласьці й Менску 21 лістапада 2001 году. У той самы дзень вызвалены ад займаемай пасады. Леанід Калугін правёў у турме каля паўгода. Зараз ён знаходзіцца пад падпіскай аб нявыезьдзе.

Калугіна абвінавачваюць па трох артыкулах Крымінальнага кодэксу. У прыватнасьці, ён абвінавачваецца ў злоўжываньні службовым становішчам, незаконнай прадпрымальніцкай дзейнасьці й невяртаньні валютных сродкаў з-за мяжы. Дырэктару заводу пагражае пазбаўленьне волі тэрмінам да 8 гадоў і канфіскацыя.

Зрэшты, у “справы Леаніда Калугіна” быў і палітычны аспэкт -- летам 2001г. ён заявіў пра намер удзельнічаць у прэзыдэнцкіх выбарах, аднак не набраў належную колькасьць галасоў для рэгістрацыі ў якасьці кандыдата.

Нагадаем, што нядаўна Вярхоўны суд вынес прысуд адносна двух прадстаўнікоў дырэктарскага корпусу краіны – былога прэзыдэнта канцэрну "Белдзяржхарчпрам" Віктара Казекі й ягонага сына Андрэя Казекі, экс-начальніка аддзелу збыту РУП "Менск Крышталь". Абодва яны атрымалі самы жорсткі за апошні час прысуд – 12 і 10 гадоў пазбаўленьня волі з канфіскацыяй маёмасьці.