У зыску адмовіць! :: Хартыя'97 :: Навiны

Вышэйшы гаспадарчы суд Беларусі адмовіў выдавецкаму ўнітарнаму прадпрыемству «Марат» у зыску супраць Міністэрства інфармацыі ў сувязі зь неправамоцным, як лічыць выдавецтва, вынясеньнем «Белорусской деловой газете» папярэджаньня за публікацыю артыкула «Барский имидж» («БДГ» ад 18.04.2003 г.)

У артыкуле “Барский имидж”, на думку Міністэрства інфармацыі, газэта распаўсюдзіла зьвесткі, якія абражаюць гонар й годнасьць прэзыдэнта Рэспублікі Беларусь. Нагадаем, што гэта было бліц-апытаньне адносна публікацыі ў расейскай газэце “Мегаполис-экспресс” інтэрвію першай прыгажуні Расеі Сьвятланы Каралёвай, у якім яна распавядае пра сваё знаёмства з Аляксандрам Лукашэнкам і вечар, які яна правяла ў яго рэзыдэнцыі. Больш за ўсё Міністэрства інфармацыі абурыла тое, што Аляксандар Лукашэнка не адпускаў прыгажуню дадому. “Он сказал: "Какой поезд? Завтра утром полетите на моем личном самолете”, -- прызналася Сьвятлана Каралёва расейскай газэце. “БДГ” усяго толькі даслоўна яе працытавала.

Напэўна, Міністэрства інфармацыі, якое рыхтавала Закон “Аб друку і іншых сродках масавай інфарамцыі” забыла, што гэты самы закон вызваляе выданьне ад адказнасьці ў выпадку цытаваньня ці спасылкі на іншыя СМІ, словам, адказнасьць за дакладнасьць інфармацыі нясе яе першы распаўсюднік, у дадзеным выпадку – “Мегаполис-экспресс”.

Аднак Вышэйшы гаспадарчы суд палічыў прэтэнзіі Мінінфармацыі абсалютна правамоцнымі і прызнаў, што газэта сапраўды закранула гонар і годнасьць Аляксандра Лукашэнкі, і пастанавіў: у зыску адмовіць.

Нагадаем, што 20-22 траўня "Белорусская деловая газета" і яе дадатак атрымалі тры папярэджаньні ад Міністэрства інфармацыі. Зь іх два папярэджаньні -- уласна "БДГ" і адно – дадатку «БДГ. Для служебного пользования». Папярэджаньні сталі падставаю для закрыцьця газэтаў на тры месяцы.