«У звычайную школу мяне павядуць пад аўтаматамі»,

сказаў адзін з навучэнцаў Коласаўскага ліцэю на сутрэчы зь міністрам адукацыі Пятром Брыгадзіным. У Нацыянальным дзяржаўным гуманітарным ліцэі імя Якуба Коласа Брыгадзін правёў больш за гадзіну. Слухаючы выступы бацькоў і выкладчыкаў, часта пагаджаўся, ківаў галавой. А дзяўчынка ў залі плакала наўзрыд у татава плячо. Праз шэрагі ёй перадавалі таблеткі валідолу. Хлопчык-выпускнік ля сьцяны, ужо на галаву вышэй за маму, ледзь стрымліваў сьлёзы.

“І мы, і дзеці задаволеныя Коласам. Патлумачце, чым ён не задавальняе вас?” – патрабавалі бацькі. Зьдзіўлялася й намесьнік дырэктара Ірына Сідарэнка: “Ліцэй працуе ў рэжыме разьвіцьця. У нас геамэтрычная прагрэсія посьпехаў. Навошта на піке ўстановы мяняць кіраўніка?” У адказ міністар заявіў, што проста ідзе “ратацыя кадраў”.

Уладзімер Раманцаў, старэйшы сын якога ўжо навучаецца ў ліцэі, а двое малодшых сёлета сюды паступаюць, казаў, што для дзяцей беларускамоўных сем’яў ліцэй – адзіная сярэдняя навучальная ўстанова ў Менску, дзе яны пачуваюць сябе камфортна: “Мы памянялі чатыры школы, пакуль прыйшлі сюды. Паўсюль зачыняюць беларускія клясы. Кожны раз гэта стрэс. З расейскай школы дзіцёнак прыходзіць разьбітым. Яму блага. Ён увесь час перакладае з расейскай на беларускую”.

“Калі Колас ідзе па калідоры, мы не баімося запытаць у яго колькі часу. Мы пакідаем сумкі ля кабінэтаў. Бо мы ведаем, што зь імі нічога ня здарыцца. На ўроках літаратуры мы пішам вершы. Ні ў адной школе няма такой атмасфэры. І зараз я ня ведаю, што будзе са мной у верасьні. У звычайную школу мяне павядуць пад аўтаматамі. І няма гарантыі, што праз тры дні я там не павешуся”, -- на словы студэнта ІІІ курсу Глеба Лабадзенкі, міністар запэўніў: “Не хвалюйся, увосень пойдзеш у ліцэй”.

Пасьля размовы сам насам з Пятром Брыгадзіным Уладзімер Колас прызнаўся: “Мне далі зразумець, што я не застануся на гэтай пасадзе ні пры якіх абставінах. Але міністар сказаў, што кандыдатура прызначанага дырэктара можа быць перагледжанай”.

Разам з Коласам зь ліцэю зьбіраюцца зыходзіць лепшыя выкладчыкі. Бацькі ў разгубленасьці. Што будзе зь ліцэям, пакуль дакладна сказаць ніхто ня можа. Пётар Брыгадзін ня выключыў магчымасьць яго пераводу ў недзяржаўны статус. Але ў бліжэйшыя два месяцы пачнецца перавод ліцэю ў рукі Менгарвыканкаму. Хутчэй за ўсё, увосень Коласаўскі ліцэй “прапішуць” у будынку ліцэю БДУ. Бо ўласны будынак знаходзіцца ў аварыйным стане.

19 чэрвеня ліцэісты з бацькамі зьбіраюцца выйсьці на пікеты з патрабаваньнем не разбураць ліцэй і пакінуць свайго дырэктара.

ddddd