Суд ліквідаваў «Грамадзянскія ініцыятывы» :: Хартыя'97 :: Навiны

17 чэрвеня Гомельскі абласны суд вынес рашэньне па зыску ўпраўленьня юстыцыі аблвыканкаму аб закрыцьці абласнога грамадзкага аб’яднаньня «Грамадзянскія ініцыятывы». Упраўленьне юстыцыі сьцьвярджала, што ў часе праверкі былі выяўленыя факты сыстэматычнага парушэньня грамадзкім аб’яднаньнем уласнага статуту й заканадаўства краіны. У прыватнасьці, «Грамадзянскія ініцыятывы» абвінавачваліся ў нямэтавым выкарыстаньні замежнай бязвыплатнай дапамогі. І хаця па выніках комплекснай праверкі (у студзені 2003 году) супрацоўнікі падаткавай інспэкцыі такіх парушэньняў не знайшлі, суд прызнаў аб’яднаньне «Грамадзянскія ініцыятывы» віноўным у парушэньні прэзыдэнцкага дэкрэту аб нямэтавым выкарыстаньні бязвыплатнай замежнай дапамогі.

Акрамя таго, суд устанавіў, што “Грамадзянскія ініцыятывы” выдавалі і распаўсюджвалі агітацыйныя матэрылы, парушалі статут арганізацыі ў частцы прыёму й выключэньня сябраў аб’яднаньня, а таксама стварэньня арганізацыйных структураў -- такіх як рэсурсны экспэртна-аналітычны цэнтр й моладзевы клюб.

На падставе гэтых высноваў суд прыняў рашэньне аб ліквідацыі грамадзкага аб’яднаньня “Грамадзянскія ініцыятывы”.

Як перадае БелаПАН, кіраўніцтва аб’яднаньня і адвакат лічыць рашэньне суда абсурдным і рыхтуецца падаваць апеляцыю ў Вярхоўны суд краіны.