Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
19 чэрвеня ў Віцебску сябры Кансэрватыўна-хрысьціянскай партыі - БНФ Уладзімер Плешчанка і Аляксандар Салаўян аштрафаваныя на 2 мільёны рублёў. Як паведамляе прэс-служба КХП - БНФ, 19 чэрвеня актывісты арганізацыі зьбіралі ў цэнтры Віцебску подпісы пад заявамі ў суд на дзеяньні “антыбеларускага рэжыму па здачы сувэрынітэту й незалежнасьці Беларусі й плянаў анэксіі нашай краіны агрэсыўнай Расеяй” і былі затрыманыя супрацоўнікамі міліцыі.
У “саюзу” Беларусі й Расеі больш праціўнікаў, чым прыхільнікаў. Такое меркаваньне ў інтэрвію "Союз-инфо" выказаў у Санкт-Пецярбургу першы намесьнік старшыні парлямэнцкага сходу "саюзу" (ПСС) Беларусі й Расеі Вадзім Папоў.
У час сустрэчы з дыпляматамі АБСЭ, якая адбылася 17 чэрвеня, міністар інфармацыі Беларусі Міхаіл Падгайны заявіў, што не намерваецца перадаваць законапраект аб СМІ для разгляду ў Раду Эўропы, бо гэта не ўваходзіць у кола яго паўнамоцтваў. Перадаць дакумэнт міжнародным структурам пры жаданьні можа або Міністэрства замежных справаў, або “парлямэнт”, сказаў Падгайны. На дадзены час, паведаміў ён, праект закону пры адміністрацыі прэзыдэнта. Плянуецца, што праз два тыдні ён будзе пададзены на разгляд у “парлямэнт”.
Як паведаміла прэс-сакратар беларускага офісу Арганізацыі па бясьпецы й супрацоўніцтву ў Эўропе Хайдзі Сьміт на прэс-канфэрэнцыі ў Менску 19 чэрвеня, прадстаўнікі офісу прысутнічаюць на ўсіх паседжаньнях суда па “БДГ” і пішуць справаздачы, якія адпраўляюць у цэнтральны офіс арганізацыі ў Вене. Акрамя таго, супрацоўнікі АБСЭ ўжо атрымалі пратаколы аб канфіскацыі накладу выданьня і зараз спрабуюць вызначыць, наколькі законна гэта было зроблена. У ліпені 2003 году, паведаміла Хайдзі Сьміт, кіраўнік офісу АБСЭ Эбэрхард Хайкен выступіць у Радзе Эўропы з дакладам аб сытуацыі ў Беларусі.
19 чэрвеня ў адміністрацыі прэзыдэнта прынялі бацькоў навучэнцаў Нацыянальнага дзяржаўнага гуманітарнага ліцэю імя Якуба Коласа. У сустрэчы з супрацоўнікам адміністрацыі Мікалаем Шаўцовым прынялі ўдзел сябры бацькоўскага камітэту ліцэю Алена Санько і Сяргей Занкевіч.
Амэрыканскі дыплямат Джордж Крол, прызначаны прэзыдэнтам Джорджам Бушам новым амбасадарам ЗША ў Менску выступіў 18 чэрвеня на слуханьнях у Камітэце па замежных справах Сэнату ЗША, прысьвечаным зацьвярджэньню яго кандыдатуры. Крол заявіў, што, на думку амэрыканскай адміністрацыі, надзеі на пераўтварэньні Беларусі ў нармальную дэмакратычную дзяржаву не спраўдзіліся. Прыярытэтным накірункам дзейнасьці амэрыканскай амбасады ў Менску павінна стаць пашырэньне кантактаў зь беларускімі грамадзянамі, асабліва моладзьдзю, якой ЗША намерваюцца аказваць падтрымку ў стварэньні грамадзянскай супольнасьці, незалежных СМІ, дэмакратыі й рынкавай эканомікі. Акрамя таго, сказаў Крол, Злучаныя Штаты “маюць сур’ёзную занепакоенасьць у сувязі з роляй Беларусі ў перадачы ўзбраеньняў і іншых матэрыялаў” так званым праблемным дзяржавам. Прапануем Вашай увазе тэкст выступу новага амбасадара ЗША ў Менску цалкам.
Як стала вядома прэс-цэнтру Хартыі’97, 18 чэрвеня прадстаўнікі Офісу АБСЭ ў Менску наведалі спэцпрыёмнік-разьмеркавальнік па вуліцы Акрэсьціна. Супрацоўнікі спэцпрыёмніка пацьвердзілі, што наведваньне адбылося і што абмяркоўваліся ўсе скаргі на ўмовы ўтрыманьня ў дадзенай установе. Прадстаўнікі офісу АБСЭ агледзілі камэры прыёмніку-разьмеркавальніка й прыйшлі да высновы, што ўмовы ўтрыманьня зьняволеных не адпавядаюць прымальным стандартам.
Невялікая пераможная вайна Злучаных Штатаў супраць Іраку, падобна, не прымусіла беларускае кіраўніцтва зьмяніць свой пункт погляду на сытуацыю ў сьвеце. Зараз Менск ўвязваецца ў новую сварку зь дзядзькам Сэмам – ужо адносна Ірану й Паўночнай Карэі. А падкладка таксама – нелюбоў да Амэрыкі зь яе навязьлівай ідэяй дэмакратыі.
Аляксандар Лукашэнка зноў заявіў пра сваю гатоўнасьць у трэці раз стаць прэзыдэнтам у выпадку, калі “хтосьці будзе ствараць нестабільнасьць” і краіна “ня будзе рухацца да спакою й парадку”. На нарадзе адносна ўвядзеньня адзінай валюты Беларусі й Расеі Лукашэнка паабяцаў абавязкова запытаць у народа дазвол балятавацца на трэці тэрмін. Натуральна, для гэтага спачатку патрабуецца зьмяніць канстытуцыю, правесьці рэфэрэндум і папрасіць народ даць “дабро” на зьмену канстытуцыі. Ну а пасьля ўнесьці неабходныя зьмены, правесьці выбары й стаць прэзыдэнтам.
Міністэрства абароны Беларусі выступае супраць стварэньня помнікаў і абеліскаў на месцы захаваньняў парэшткаў нямецкіх жаўнераў і афіцэраў. “Беларускі бок лічыць магчымым у дадзенай сытуацыі весьці размову толькі аб вызначэньні межаў захаваньняў, пошуку парэшткаў і ўсталяваньні імёнаў”, -- заявіў памочнік міністра абароны па маральна-псыхалягічным забясьпячэньні ўзброеных сілаў Беларусі палкоўнік Уладзімер Сераштан на прэс-канфэрэнцыі ў Менску ў чацьвер.
Саюз эвангельскіх хрысьціянаў-баптыстаў зьвярнуўся да старшыні Камітэту па справах рэлігіяў і нацыянальнасьцяў пры Савеце міністраў Беларусі Станіслава Буко зь лістом, у якім гаворыцца, што рэлігійныя супольнасьці і арганізацыі Саюзу ЕХБ ня могуць прымаць на сябе забавязкі, паводле новай рэдакцыі закону “Аб свабодзе сумленьня й рэлігійных арганізацыях”.
Вьетнамскі доктар Фам Хон Сон (Pham Hong Son), які авбінавачваецца ў разьмяшчэньні ў Інтэрнэце тэкстаў антыўрадавага зьместу, быў прызнаны віноўным у шпіянажы і асуджаны да 13 гадоў пазбаўленьня волі, перадае Reuters. Адным з галоўных абвінавачваньняў, высунутых супраць Сона, зьяўляецца тое, што ён перавёў на вьетнамскую мову і разьмясьціў у Інтэрнэце артыкул "Што такое дэмакратыя", арыгінал якой знаходзіцца на сайце Дзяржаўнага дэпартамэнту ЗША.
Пра гэта 19 чэрвеня заявіла на сваёй прэсавай канфэрэнцыі супрацоўніца офісу Гайды Сьміт. Падставай сталі апошнія падзеі вакол незалежных газэтаў, няўрадавых арганізацыяў і Нацыянальнага дзяржаўнага гуманітарнага ліцэю імя Якуба Коласа.
У эканоміцы Беларусі захоўваецца агульная негатыўная тэндэнцыя разьвіцьця інвэстыцыйнай сфэры, якая выяўляецца ў нізкім узроўні інвэстыцыяў і недастатковым нават для простага ўзнаўленьня асноўных вытворчых фондаў.
Наведаўшы Берасьце, Аляксандар Лукашэнка заявiў, што беларуская эканомiка павiнна разьвiвацца найперш уласным коштам, каб ня трапiць у кабалу да замежных iнвэстараў. Лукашэнка таксама абвесьцiў пра намер правесьцi рэвiзiю ўсiх створаных у Беларусi свабодных эканамiчных зонаў.
Улады Беларусі не гатовыя да ўвядзеньня расейскага рубля, нягледзячы на саступкі Расеі ў гэтым пытаньні. Такое меркаваньне "Интерфаксу" выказаў беларускі незалежны экспэрт Валеры Дашкевіч. Паводле яго, падрыхтаваны праект пагадненьня аб увядзеньні ў Беларусі расейскага рубля практычна цалкам здымае раней выказаныя пярэчаньні беларускага боку. "Нацыянальны банк Рэспублікі Беларусь атрымаў практычна ўсе паўнамоцтвы, на якія разьлічваў, уключаючы абмежаваную магчымасьць эмісіі безнаяўных грошай", - адзначыў ён. Пры гэтым, як лічыць В.Дашкевіч, улады і эканоміка краіны не гатовыя да ўвядзеньня расейскага рубля. "У беларускага ўраду было дастакова часу, каб уніфікаваць з Расеяй падаткавую, бюджэтную, мытную і манетарную палітыку. Але зроблена вельмі мала, бо рэформы немагчымыя праз адсутнасьць палітычнай волі”, - сказаў экспэрт.
Агульны аб’ём інвэстыцыяў у асноўны капітал павінен павялічыцца да 2010 году ў Беларусі ў 2,5 разы ў параўнаньні з 2000 годам і скласьці 37 млрд. даляраў ЗША. Пра гэта паведамілі "Интерфаксу" ва ўрадзе рэспублікі, спасылаючыся на асноўныя парамэтры й задачы інвэстыцыйнай палітыкі да 2010 году, якія вызначаныя Нацыянальнай праграмай прыцягненьня інвэстыцыяў.
У апошні час толькі каля 8 адсоткаў жыхароў Віцебску, якія стаяць у чарзе на жыльлё, пагаджаюцца на будаўніцтва кватэр зь дзяржаўнай падтрымкай. Астатнія ў чарзе адмаўляюца ад такой магчымасьці праз адсутнасьць грошай. Пра гэта паведаміў начальнік аддзелу па кіраваньні будаўнічым комплексам Віцебскага гарвыканкаму Ўладзімер Каташук 18 чэрвеня на паседжаньні прэзыдуюму гарсавету, камэнтуючы сытуацыю з будаўніцтвам у горадзе.
Прадстаўнікі дзяржаўных і камэрцыйных структураў праігнаравалі ўдзел у паседжаньні “круглага стала” “Курапаты – 15 гадоў абароны”, якое 19 чэрвеня адбылося ў Менску, у канфэрэнц-залі гатэлю “Планета”.
19 чэрвеня ў Беларусі на 16 адсоткаў вырас межавы ўзровень тарыфаў на перавозку пасажыраў легкавымі таксоўкамі ў дзённы час. Як патлумачыў БелаПАН дырэктар дэпартамэнту аўтамабільнага транспарту Міністэрства транспарту й камунікацыяў Валеры Міленькі, рост кошту паслуг таксі абумоўлены павелічэньнем коштаў на паліва, запасныя часткі й камплектавыя.
Беспрэцэдэнтную акцыю супраць злосных неплатнікаў квартплаты ўчынілі з дазволу ўладаў камунальныя службы Барысаву. У сьвежым нумары самай папулярнай мясцовай газэты “Борисовские новости” яны апублікавалі імёны даўжнікоў, якія пражываюць у цэнтры гораду. Адначасова ў іншым матэрыяле агучаны сьпіс жыхароў гораду й раёну, якія даўно не плоцяць за прыродны газ. Служба ўліку вытворчага ўчастку “Барысаўміжрайгаз” у камэнтары да публікацыі паведамляе, што з пачатку году з 179 выяўленых даўжнікоў у 60 газ ужо адключаны, перадае БелаПАН.
Па стану на 18 чэрвеня два баранавіцкіх прадпрыемства (трыкатажная фабрыка “Бавэрці” і прадпрыемства сацыяльнай дапамогі інвалідам “Дапамога”) не выплаціцлі заробную плату работнікам яшчэ за сакавік, пяць -- за красавік. Як паведаміла на пасежданьні гарвыканкаму супрацоўнік ўпраўленьня эканомікі Ніна Арцюх, агульная запазычанасьць гарадзкіх прадпрыемстваў па заробнай плаце пераўзышла 100 млн. рублёў. Паводле яе, на многіх прадпрыемствах затрымкі з выплатай заробку сталі даўно кранічнымі.
Колькасьць афіцыйна зарэгістраваных беспрацоўных у Гомельскай вобласьці складае на дадзены час 24,2 тыс. чалавек. Гэта амаль на 5 тыс. чалавек болей, чым на адпаведную дату леташнега году. Як паведамілі ва ўпраўленьні службы занятасьці насельніцтва, узровень беспрацоўя па вобласьці складае зараз 3,8%.
Не ўдаецца цягам 10 дзён дабіцца адмены абмежаваньня Расеяй ўвозу беларускай птушкі, прадукцыі зь яе і яек. У Міністэрстве сельскай гаспадаркі й харчаваньня ня могуць ацаніць эканамічныя наступствы абмежаваньня.
У Беларусі плянуецца стварыць новы тэлевізійны канал. Гэта будзе адзіны канал МТРК. Паводле словаў Людмілы Сідаровіч, для стварэньня новага тэлеканала плянуецца выдзяліць частоты прадстаўніцтвам кампаніі ва ўсіх краінах СНД.
Абацаньне, дадзенае ў пачатку чэрвеня Аляксандрам Лукашэнкам расейскаму міністру фінансаў Аляксею Кудрыну і кіраўніку Цэнтральнага банку Расеі Сяргею Ігнацьеву аб тым, што ён адмовіцца ад валютнага сувэрынітэту (у прыватнасьці, пагодзіцца з тым, каб эмісійны цэнтар знаходзіўся ў Маскве), спатрэбілася яму для новай масіраванай кампаніі эканамічнага шантажу Расеі, лічаць беларускія й расейскія экспэрты. Гэта выпрабаваны прыём, да якога беларускі бацька найбольш часта прыбягае з таго часу, як улада ў Расеі перайшла да Ўладзімер Пуціна і ў расейска-беларускіх дачыненьнях пачаліся сур’ёзныя разыходжаньні ў падыходах да будаўніцтва “саюзнай дзяржавы”.
, iнформэр
