З вуліц Менску кветкі прыбіраюць у імя эстэтыкі? :: Хартыя'97 :: Навiны

Калі ўчора раніцай мы набывалі кветкі непадалёку ад станцыі мэтро “Акадэмія навук”, нечакана прадаўцы сталі скардзіцца:“А нас зьбіраюцца зьнесьці. У аўторак вы тут кветкі ўжо не набудзеце”.

- А якую прапанавалі альтэрнатыву?

- А ніякай. Сказалі, што гэта трэба для добраўпарадкаваньня Менску, а мы сваімі кветкамі псуем выгляд гораду!?

Жанчыны скардзіліся, маўляў у бліжэйшы час будуць занятыя пошукам працы. І вялі свае няхітрыя падлікі: кожны ўладальнік шапіка акрамя заробку штомесяц плоціць 180-200 даляраў падаткаў. Толькі на кветачных вітрынах ля Акадэміі навук зараз занята каля 90 чалавек (прадаўцы і гаспадары).

Разам з кветкавымі шапікамі чакаюць пераменаў і шапікі з агароднінай і садавінай. Гэтыя гандляркі былі паспакайней: гаспадары сказалі, што распараджэньне “нібыта як адносяць” і гандляваць на вуліцы яны пакуль змогуць.

Аказваецца, кветкі і садавіна – гэта працяг старой гісторыі з пераносам з цэнтра гораду шапікаў, якія гандлююць півам дый шакалядам. Згодна рашэньню Менгарвыканкаму ад 15 студзеня 2002 году №17 “Аб упарадкаваньні разьмяшчэньня й функцыянаваньня аб’ектаў дробнарозьнічнага гандлю на тэрыторыі Менску”, мэта такіх ракіровак -- паляпшэньне эстэтычнага ўзроўню сталіцы. Таксама абумоўлены “межавы тэрмін функцыянаваньня аб’ектаў дробнарозьнічнага гандлю” -- 1 ліпеня. Пасьля гэтага прадаўцоў плянуюць перавесьці ў адмыслова абсталяваныя памяшканьні, што, вядома ж, паўплывае на кошты.

Што будзе з прадаўцамі кветак?

- Пакуль мы канчатковага рашэньня не прынялі, і ўсе пытаньні й камэнтары вы зможаце атрымаць толькі на наступным тыдні, - сказаў “Комсомолке” начальнік кіраваньня гандлю й паслугаў Аляксандар Лукашэвіч.