Армэнія й Беларусь актывізуюць ваеннае супрацоўніцтва :: Хартыя'97 :: Навiны

Армэнія й Беларусь намерваюцца актывізаваць ваеннае супрацоўніцтва. Адпаведная дамоўленасьць зафіксаваная ў пратаколе па выніках візыту ў Ерэван першага намесьніка міністра абароны, начальніка Генэральнага штабу УС Беларусі генэрал-лейтынанта Сяргея Гурулёва. Як паведаміў у сераду на прэс-канфэрэнцыі першы намесьнік міністра абароны, начальнік Генштабу УС Армэніі генэрал-палкоўнік Міхаіл Аруцюнян, Армэнія накіруе ў Беларусь прадстаўнікоў Чарэнцванскага станкабудаўнічага заводу для азнаямленьня з тэхналёгіяй рамонту бранетанкавай тэхнікі й ўзбраеньня.

Цягам месяца будзе вырашанае пытаньне навучаньня армянскіх адмыслоўцаў у ваенных навучальных установах Беларусі. Акрамя таго, армянскі бок забавязаўся прыняць меры па хутчэйшай ратыфікацыі пагадненьня аб узаемных пастаўках узбраеньня й ваеннай тэхнікі ад 6 чэрвеня 2002 году.

Генэрал-палкоўнік Аруцюнян паведаміў таксама, што на 10-11 кастрычніка заплянаваны візыт міністра абароны Армэніі Сержа Саркісяна ў Менск. У час візыту прадстаўнікі бакоў абмяняюцца досьведам мадэрнізацыі ўзбраеньня і ваеннай тэхнікі, рэфармаваньня апэратыўна-баявой падрыхоўкі сілаў абедзьвюх краінаў, а таксама ўдзелу ў праграме НАТО “Партнэрства ў імя міру”.

У сваю чаргу, генэрал-лейтынант Гурулёў адзначыў, што абарончы комплекс Беларусі вырабляе для продажу шэраг відаў узбраеньняў, тэхнікі, прыбораў кіраваньня й назірання. Паводле яго, у час візыту Саркісяна ў Беларусь будуць падрабязна адпрацаваныя пытаньні экспарту і імпарту ўзбраеньняў.