Зьміцер Бандарэнка: зьнішчыць Беларусь нікому не ўдасца :: Хартыя'97 :: Навiны

«Закрыцьцё Нацыянальнага ліцэю нельга аддзяляць ад іншых фактаў ціску грамадзянскай супольнасьці ў Беларусі. Закрыцьцё газэт, масавыя рэпрэсіі супраць дырэктарскага корпусу і бізнэсоўцаў, арышты моладзевых актывістаў – усё гэта кажа пра тое, што дыктатар проста знахабіўся ад уласнай беспакаранасьці. У 1996 годзе Лукашэнка закрыў беларускае «Радыё 101,2», на якім я працаваў. Зараз закрыты Беларускі ліцэй, у якім навучаецца мая дачка. І калі мы не жадаем, каб ахвярамі дыктатуры сталі яшчэ і нашыя ўнукі, мы павінны ўзмацніць наш Супраціў гэтай злачыннай ўладзе”, -- такім чынам пракамэнтаваў ліквідацыю Нацыянальнага дзяржаўнага гуманітарнага ліцэю імя Якуба Коласа каардынатар грамадзянскай ініцыятывы Хартыя’97 Зьміцер БАНДАРЭНКА.

-- Так, мы бачым, як нам здраджвае Эўропа, і радасьць ад “посьпехаў” рэжыму сёньня могуць падзяліць разам з Лукашэнкам эўрапэйскія палітыкі – прыхільнікі супакаеньня дыктатара на чале з Утай Цапф. Але трэба глядзець праўдзе ў вочы. Асноўная прычына сёньняшняй сытуацыі – гэта пасыўнасьць саміх беларусаў. Многія спадзяюцца, што свабоднай краіна стане неяк сама па сабе.

Але Беларусь жыве. Мы ўсе гэта адчулі ў дзень разьвітаньня з Васілём Быкавым, калі дзясяткі тысячаў людзей па поклічу сэрца прыйшлі пакланіцца вялікаму беларусу. Мы павінны быць моцнымі. Мы павінны знайсьці новыя формы барацьбы. І калі закрываюцца беларускія школы й ліцэі, значыць мы разгорнем сотні падпольных гурткоў, дзе дзеці здолеюць даведацца праўду аб гісторыі Беларусі і вывучаць родную мову. Зьнішчыць Беларусь ужо нікому не ўдасца, -- лічыць Зьміцер Бандарэнка.

ddddd