Дырэктар навуковага інстытуту абвінавачваецца ў крадзяжы :: Хартыя'97 :: Навiны

Распачатая крымінальная справа адносна дырэктара інстытута цепла- і масаабмену Нацыянальнай акадэміі навук (НАН) Беларусі, акадэміка Алега Мартыненкі. Пра гэта ў аўторак паведамілі ў Цэнтры інфармацыі і грамадзкіх сувязяў (ЦІГС) КДБ Беларусі.

Паводле крыніцы, крымінальная справа распачатая ў адпаведнасьці з часткай 3 артыкула 210 КК Беларусі (“Крадзеж у буйным памеры шляхам злоўжываньня службовым становішчам”). У ЦІГС адзначылі, што “першапачаткова акадэміка дапытвалі ў якасьці сьведкі, і толькі ў час допыту ў сьледчага ўзьнікла падозраньне ў яго віноўнасьці”.

У інстытуце Мартыненке адмовіліся паведамляць якіяйсьці падрабязнасьці таго, што адбылося, аднак сказалі, што на дадзены час акадэмік знаходзіцца ў шпіталі.

Доктар тэхнічных навук Мартыненка быў абраны ў 1991 годзе акадэмікам НАН па спэцыяльнасьці тэрмафізіка. Ён таксама зьяўляецца акадэмікам Нью-Ёркскай акадэміі навук, чальцом Амэрыканскага таварыства інжынераў-механікаў, чальцом навуковай рады Міжнароднага цэнтру цепла-і масаабмену (Турцыя).