Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Як паведамляе азэрбайджанская апазыцыйная газэта "Азадлыг", прэзыдэнт Азэрбайджану Гейдар Аліеў памёр 26 ліпеня а 19.30 у турэцкім ваенным шпіталі "Гюльханэ" ў Анкары. Газэта, спасылаючыся на дакладную крыніцу, паведамляе, што 15 ліпеня дзейнага азэрбайджанскага прэзыдэнта прывезьлі ў Бакінскі аэрапорт Біна, дзе яму зноў стала блага. Праз некалькі хвілінаў Аліеў-старэйшы тым самым самалётам быў адпраўлены назад у турэцкі шпіталь.
Паводле іншай апазыцыйнай газэты “Ені Мусават”, азэрбайджанскія ўлады тэрміновым парадкам увялі ў Баку войскі асаблівага прызначэньня, і тлумачылі неабходнасьць прысутнасьці ваенных у сталіцы нядаўнім ускладненьнем сытуацыі на армяна-азэрбайджанскай мяжы ў раёне Нагорнага Карабаху. Як мяркуюць аналітыкі, увядзеньне войскаў выклікана неабходнасьцю прадухіліць любыя спробы апазыцыі дэстабілізаваць сытуацыю ў Азэрбайджане. Відавочным пацьверджаньнем сьмерці прэзыдэнта Азэрбайджану можа служыць факт нядаўніх арыштаў кіраўнікоў апазыцыйных і незалежных азэрбайджанскіх СМІ.
Нагадаем, што яшчэ 23 ліпеня агенцтву France Presse ананімныя дыпляматычныя крыніцы паведамлялі, што, на думку дактароў, 80-гадоваму прэзыдэнту Азэрбайджану засталося жыць два-тры дні.
