Галава МЗС Літвы Антанас Валеніс абверг абвінавачваньні ў абароне карумпаваных дыпляматаў :: Хартыя'97 :: Навiны

“Катэгарычна адхіляю гэтае абвінавачваньне, якое неадпавядае рэчаіснасьці. Калі я неадкладна вызваліў ад абавязкаў службовых асобаў, якія сябе скампраментавалі, то я дзейнічаў паводле закону і ў рамках кампэтэнцыі міністра”, -- гаворыцца ў распаўсюджанай у сераду заяве кіраўніка замежнапалітычнага ведамства. Скандаль разгарэўся пасьля навіны аб тым, што літоўскія консульскія работнікі ў Расеі й Беларусі злоўжывалі службовым становішчам.

МЗС і Дэпартамэнт дзяржбясьпекі Літвы не паведамілі аб канкрэтных фактах парушэньняў з боку консульскіх работнікаў. Паведамлялася толькі, што ад пасадаў вызваленыя шэсьць консульскіх работнікаў у Маскве, Санкт-Пецярбургу й Менску. У адстаўку таксама падаў дырэктар консульскага дэпартамэнту МЗС Літвы Гядзімас Шаўдвіціс.

У сувязі з гэтым лібэральныя дэмакраты абвінавацілі кіраўніка замежнапалітычнага ведамства ў абароне карумпаваных дыпляматаў.

“Дакумэнт Дэпартамэнту дзяржбясьпекі аб парушэньнях у консульскіх службах я атрымаў пад грыфам “сакрэтна”. І паводле закону ніводны грамадзянін, у тым ліку й міністар, ня мае права агучваць дэталі незаконнай дзейнасьці зьнятых службовых асобаў”, -- гаворыцца ў заяве міністра.

Пры гэтым у дакумэнце адзначаецца, што цяперашняя сыстэма выдачы візаў стварае ўмовы, пры якіх прыватныя фірмы, якія займаюцца пасярэдніцтвам у атрыманьні дакумэнтаў на ўезд у краіну па палегчаных умовах, маюць магчымасьць уцягваць у гэтую дзейнасьць дзяржаўных служачых.

“Я намерваюся прапанаваць ураду скасаваць розныя бюракратычныя перашкоды й абмежаваньні, якія ствараюць умовы для злачыннай дзейнасьці”, -- гаворыцца ў заяве Валеніса.