Мабільная сувязі ідзе на рэкорд :: Хартыя'97 :: Навiны

Аднаго мільёна чалавек можа дасягнуць да канца сёлетнега году колькасьць абанэнтаў мабільнай сувязі ў нашай краіне. Такую заяву зрабіў сёньня міністар сувязі Беларусі Ўладзімер Ганчарэнка на паседжаньні калегіі, прысьвечанай разьвіцьцю мабільных сетак у рэспубліцы.

Пашырэньне абанэнцкай сеткі ў Міністэрстве сувязі зьвязваюць са зьяўленьнем год таму на рынку сотавай сувязі расейскага GSM-апэратара “Мабільныя ТэлеСыстэмы”. З прыходам гэтай кампаніі на беларускі рынак колькасьць абанэнтаў беларускіх сотавых сецяў вырасла ўтрая, а “ў тарыфных плянах раней манапольнага рынку здарылася сапраўдная рэвалюцыя”. Зараз кожны з трох дзейных у Беларусі апэратараў прапануюць патэнцыйнаму абанэнту мінімум шэсьць тарыфных плянаў мабільнай тэлефаніі.

У час паседжаньня У.Ганчарэнка адзначыў, што «літаральна на днях кіраўніцтва МТС паведамілі пра зьяўленьне 200-тысячнага абанэнта». Калі ў чэрвені колькасьць абанэнтаў МТС складала 170 тысячаў чалавек, то к канцу году чакаецца, што па сецях гэтага опэратара будуць размаўляць каля 300 тысячаў чалавек.

Сёлета інвэстыцыі ў сэктар мабільнай тэлефаніі склалі 74 мільёны даляраў. Зь іх амаль 70 адсоткаў укладаньняў прыпадае на кампанію МТС. Патрабаваньне Міністэрства сувязі да ўсіх мабільных апэратараў – пашырэньне зонаў пакрыцьця і ахапленьне як мага большай колькасьці абанэнтаў.