Прыярытэт гаспадарчых судоў – выкананьне даручэньняў прэзыдэнта :: Хартыя'97 :: Навiны

Вынікі дзейнасьці гаспадарчых судоў у першым паўгодзьдзі былі падсумаваныя на паседжаньні прэзыдуюму Вышэйшага гаспадарчага суда (ВГС) Беларусі. Першы намесьнік старшыні ВГС Яўген Сьмірноў паведаміў, што за поўгода ў гаспадарчыя суды краіны ў парадку зыскавай вытворчасьці паступіла 19.511 заяваў, што на 18% болей, чым за адпаведны пэрыяд леташнега году. Агульная колькасьць справаў, разгледжаных гаспадарчымі судамі за апошні пэрыяд, склала 14.519, што на 26% болей у параўнаньні з аналягічным пэрыядам 2002 году.

Прэзыдуюм ВГС адзначыў паляпшэньне якасьці працы гаспадарчых судоў Беларусі, і ўвага старшыняў судоў была зьвернутая на неабходнасьць захаваньня дасягнутага ўзроўню працы, падтрыманьня патэнцыялу і забесьпячэньня якаснага разгляду справаў, нягледзячы на павелічэньні нагрузкі на судзьдзяў.

Прыярытэтам у дзейнасьці гаспадарчых судоў на другім этапе вызначана выкананьне даручэньняў прэзыдэнта Беларусі па пытаньнях праблемнай крэдытнай запазычанасьці банкаў і ўдасканаленьня заканадаўства аб эканамічнай слабасьці, перадае “Интерфакс”.

Акрамя таго, паводле намесьніка старшыні ВГС, гаспадарчыя суды павінны зьвярнуць увагу на пытаньні, зьвязаныя з выкарыстаньнем інвэстыцыяў. Гаспадарчыя суды павінны забясьпечыць абарону інвэстыцыйнага клімату й правоў інвэстараў, раўнапраўныя ўмовы для ўсіх інвэстараў і рэзыдэнтаў, заявіў Я.Сьмірноў.