Зачыстка працягваецца :: Хартыя'97 :: Навiны

4 жніўня праваабарончае грамадзкае аб`яднаньне "Прававая дапамога насельніцтву" атрымала паведамленьне пра пачатак справы аб ліквідыцыі аб`яднаньня. Пакуль не вядома, у чым абвінавачваецца аб`яднаньне. Але гэтая падзея сьведчыць пра тое, што ўлады актывізавалі наступ на праваабарончыя арганізацыі.

Грамадзкае аб`яднаньне "Прававая дапамога насельніцтву" існуе з 1998 года. За час сваёй дзейнасьці аказвала дапамогу маламаёмасным грамадзянам, інвалідам, непаўнагадовым, адзінокім маці, беспрацоўным. Вядомасьць аб`яднаньню надаў удзел сябраў арганізацыі ў гучных справах, зьвязаных са зьнікненьнем вядомых палітычных дзеячаў і апэратара ОРТ Зьміцера Завадзкага, а таксама ў справе па масавай гібелі людзей у пераходзе станцыі мэтро Няміга, якая адбылася па нядбайству супрацоўнікаў міліцыі.

"Дзейнасьць аб`яднаньня ў гэтым кірунку не засталася па-за ўвагай кантралюючых органаў, - кажа старшыня грамадзкага аб`яднаньня "Прававая дапамога насельніцтву" Алег Воўчак. - У верасьні 2002 года Ўпраўленьнем юстыцыі Менгарвыканкама па ўказаньні Міністэрства юстыцыі Рэспублікі Беларусь была праведзена праверка статутнай дзейнасьці аб`яднаньня".

Па выніках мінулагодняй праверкі аб`яднаньне атрымала пісьмовае папярэджаньне, у якім пазначалася, што арганізацыя ня мае права прадстаўляць інтарэсы грамадзян у судах. Папярэджаньне было абскарджана ў судовым парадку. Суд адмовіў у задавальненьні прэтэнзіяў аб`яднаньня й прызнаў папярэджаньне Ўпраўленьня юстыцыі законным.

17 красавіка 2002 года міністар юстыцыі вынес указ аб пазбаўленьні ліцэнзіі на права аказаньня юрыдычных паслугаў старшыні грамадзкага аб`яднаньня "Прававая дапамога насельніцтву" Алега Воўчака. Пра гэта старшыня аб`яднаньня даведаўся толькі праз паўгады. У бягучым годзе Упраўленьне юстыцыі Менгарвыканкаму ніякіх праверак ня ладзіла. Сябры аб`яднаньня ня ведаюць, што магло стаць падставай да ліквідацыйнага пазову.

"Сябры грамадзкага аб`яднаньня "Прававая дапамога насельніцтву" лічаць, што такія дзеяньні Міністэрства юстыцыі накіраваныя на пазбаўленьне праваабаронцаў магчымасьці аказаньня эфэктыўнай і своечасовай прававой дапамогі грамадзянам. Улады, рыхтуючыся да рэфэрэндуму па зьмяненьні Канстытуцыі Рэспублікі Беларусь і прыцягненьні паўнамоцтваў прэзідэнта, маюць намер кантраляваць дзейнасьць праваабарончых і іншых няўрадавых арганізацыяў, якія шчыльна працуюць з шырокімі коламі насельніцтва", - кажа Алег Воўчак.

8 жніўня адбудзецца сустрэча сябраў аб`яднаньня з судзёй Жупікавай. Толькі тады будзе вядома, у чым абвінавачваецца аб`яднаньне.