ЗША памянялі працэдуру выдачы візаў ва ўсіх краінах сьвету :: Хартыя'97 :: Навiны

ЗША мяняюць працэдуру выдачы візаў ва ўсіх краінах сьвету. У адпаведнасьці з новым парадкам, з 1 жніўня практычна ўсе падацелі заяваў аб выдачы неіміграцыйных візаў павінны будуць асабіста зьяўляцца на сумоўе з супрацоўнікам консульскага аддзелу амбасады ЗША.

Амбасада ЗША ў Маскве раіць падаваць заяву аб выдачы візы за 6-8 тыдняў да заплянаванай даты выезду. Без сумоўя візу могуць атрымаць толькі некалькі катэгорыяў грамадзянаў: дзеці да 16 гадоў, асобы старэй за 60 гадоў, асобы, якія атрымоўвалі візы той жа катэгорыі ня больш за год таму. Апрача таго, сумоўе непатрэбнае для атрыманьня дыпляматычных ці службовых візаў, перадае РБК.

Тым ня менш любога падацеля заявы аб выдачы візы могуць выклікаць на сумоўе з рашэньня консульскага работніка. У тэрміновым парадку сумоўе будуць праводізць толькі ў выключных выпадках, калі размова ідзе аб сьмерці або сур’ёзных мэдычных праблемах. Уводзяцца і новыя патрабаваньні да фотаздымкаў. Яны мусяць быць без рамкі, анфас і зробленыя не раней, чым цягам шасьці апошніх месяцаў.

У прэс-рэлізе, разьмешчаным на сайце амбасады, таксама прыводзяцца наступныя патрабаваньні: "галава павінна разьмяшчацца ў цэнтры фота; памеры галавы на здымку (ад макушки да падбародку) - 2,5-3,5 см; вочы павінны знаходзіцца на ўзроўні ад 2,8 да 3,5 см ад ніжняга краю фота; здымкі могуць быць каляровымі ці чорна-белымі на белым ці амаль белым фоне; фотаздымкі можна прымацаваць да заявы стэплерам або прыклеіць, але пры гэтым пры гэтым скобка павінна знаходзіцца як мага далей ад твару”.