Да 2010 году ў сельскай мясцовасьці будзе зачынена 444 школы :: Хартыя'97 :: Навiны

У сувязі зь неспрыяльнай дэмаграфічнай сытуацыяй да 2010 году колькасьць навучэнцаў у сельскай мясцовасьці зьменшыцца на 257 тысячаў 267 чалавек. Пра гэта 4 жніўня на прэс-канфэрэнцыі паведаміў намесьнік міністра адукацыі Беларусі Казімір Фарыно. У выніку чаго, паводле яго, да 2010 году на сяле будуць зачыненыя 444 школы. На сёньня ў сельскай мясцовасьці працуе 3 095 навучальныя ўстановы, дзе навучаецца 350 130 школьнікаў.

Між тым, як адзначыў К.Фарыно, паралельна з закрыцьцём школаў ідзе працэс іх рэструктурызацыі – зьмены статуса навучальнай установы ў залежнасьці ад той дэмаграфічнай сытуацыі, якая складваецца ў тым ці іншым рэгіёне. Так сёлета зь сярэдніх у базавыя будзе рэарганізавана 39 школаў, з базавых у пачатковыя – 25, з базавых у сярэднія – 3 школы. Сродкі, сэканомленыя ў выніку рэструктурызацыі, накіроўваюцца на набыцьцё аўтобусаў для падвозу навучэнцаў у школы ў сельскай мясцовасьці і ўмацаваньне матэрыяльна-тэхнічнай базы навучальных установаў.

Як паведамляе БелаПАН, паводле Казіміра Фарыно, найбольш актуальным на сёньня зьяўляецца пытаньне ахопу дашкольнай адукацыяй на сяле дзяцей пяцігадовага ўзросту. Гэты паказчык складае 59 адсоткаў, у той час як у горадзе – 90 адсоткаў. Дзецям гэтага ўзросту неабходна ствараць роўныя ўмовы для адукацыі, а таксама разьвіць індывідуальныя творчыя здольнасьці і падрыхтаваць дзіцёнка да жыцьця, лічыць намесьнік міністра адукацыі.