Улады не зьбіраюцца зьніжаць кошт «Белтрансгаза» :: Хартыя'97 :: Навiны

5 жніўня завяршыўся чарговы раўнд перамоваў "Газпрома" зь беларускімі чыноўнікамі па прыватызацыі "Белтрансгаза". Бакі запратакаліравалі ўсе разыходжаньні адносна стварэньня СП. І іх стала меней. Але ў прынцыповым пытаньні – пра кошт "Белтрансгаза" – беларускія ўлады па-ранейшаму не зьбіраюцца здаваць свае пазыцыі. І спадзяюцца, што сустрэча Аляксандра Лукашэнкі з Уладзімерам Пуціным прымусіць расейскага манапаліста заплаціць за "Белтрансгаз" па поўнай праграме.

Сустрэча намесьніка старшыні "Газпрома" Аляксандар Разанава зь беларускімі чыноўнікамі завяршыліся пакуль толькі адной перамогай "Газпрома". Пастаўкі газу ў Беларусь будуць ажыцьцяўляцца па ўмовах расейскай кампаніі, а патрабаваньне Беларусі павялічыць пастаўкі да 33 млрд кубамэтраў ня будзе задаволеным. "Газпром" будзе экспартаваць у Беларусь па аптовых коштах толькі 10,3 млрд кубамэтраў газу ў год.

Зрэшты, беларускія чыноўнікі паабяцалі прадставіць дадзеныя аб патрэбах рэспублікі і плянуюць націснуць на “сардэчнасьць” “Газпрома”.

Не ўдалося Беларусі прабіць і транзітны кардон "Газпрома". Нагадаем, што беларускія чыноўнікі патрабавалі ад расейскага боку павелічэння транзіту праз Беларусь да 100 млрд кубамэтраў у бліжэйшыя 8 гадоў. На гэта "Газпром" адказаў рэзкай адмоваю: цяперашнія экспартныя кантракты ў Эўропу не дазваляюць значна павялічыць транзіт праз Беларусь.

Манапаліст таксама запатрабаваў ад беларускіх уладаў падрабязнага ТЭО на 1,726 млрд дал., якія Беларусь патрабуе ад Расеі ў выглядзе інвэстыцыяў у газавую галіну рэспублікі.

Відавочна, Беларусь вымушаная ісьці на некаторыя саступкі. Але робіцца гэта толькі дзеля захаваньня непарушнасьці кошту прыватызацыі “Белтрансгаза" ў 5 млрд дал. "Газпром" лічыць, што больш 600 млн дал. "Белтрансгаз" не каштуе. Зразумела, што пры такіх разыходжаньнях вырашыць спрэчку можа толькі незалежная ацэнка, і "Газпром" ужо прапаноўваў беларускім чыноўнікам яе правесьці. Аднак Менск працягвае мэтадычна выступаць супраць яе правядзеньня.