Міністар інфармацыі падаў у адстаўку? :: Хартыя'97 :: Навiны

Паводле зьвестак з крыніцаў у Міністэрстве інфармацыі, Міхаіл Падгайны падаў у адстаўку з пасады міністра, і цяпер яе павінен прыняць ці адхіліць Аляксандар Лукашэнка. У міністэрстве ад усялякіх камэнтароў на гэты конт адмаўляюцца, і толькі першы намесьнік міністра Станіслаў Нічыпаровіч адказаў на пытаньне Радыё Свабода: “Вось-вось будзе ўсё вядома”.

Яшчэ ў сакавіку на нарадзе ў пытаньнях ідэалёгіі Аляксандар Лукашэнка абвінаваціў кіраўніцтва інфармацыйнага ведамства ў тым, што дзяржаўныя СМІ страчваюць аўдыторыю, тады як колькасьць недзяржаўных мэдыяў расьце. Адказнасьць за гэта была ўскладзеная пэрсанальна на Міхаіла Падгайнага.

Лукашэнка заявіў, што міністэрства “выступае ў ролі статыста і назіральніка” і запатрабаваў ад міністра правесьці “інвэнтарызацыю ўсіх наяўных у краіне інфармацыйных рэсурсаў”. За «інвэнтарызацыю» міністра Падгайны ўзяўся зь незвычайным энтузіязмам – колькасьць закрытых незалежных газэт вясной-летам сёлетнега году пераваліла за дзясятак. Ад таго часу дзейнасьць міністэрства пад пільнай увагай Лукашэнкі, а ў само ведамства была накіраваная адмысловая камісія з генэральнай пракуратуры.

Дарэчы, па выніках праверкі кантрольныя органы спагналі з прадпрыемстваў міністэрства амаль 210 мільёнаў рублёў штрафных санкцыяў, а Лукашэнка даручыў пракуратуры зрабіць “самыя жорсткія захады” ў справе навядзеньня парадку ў сыстэме міністэрства.