ЛДП вылучыць кандыдата ў прэзыдэнты :: Хартыя'97 :: Навiны

6 верасьня Лібэральна-дэмакратычная партыя (ЛДП) правядзе свой чарговы, восьмы зьезд. Як паведаміў БелаПАН лідэр партыі Сяргей Гайдукевіч, на зьезьдзе будзе прынятае рашэньне аб вылучэньні кандыдата ад ЛДП на прэзыдэнцкія выбары. "Мы папярэдне рыхтуемся да гэтай падзеі, каб пасьля, як бальшыня партыяў, ня быць да яе арганізацыйна негатовымі”, -- сказаў С.Гайдукевіч. Можна не сумнявацца, што менавіта ён і стане кандыдатам у прэзыдэнты краіны.

На зьезьдзе прагучыць даклад лідэра партыі аб грамадзка-палітычнай сытуацыі ў краіне і задачах ЛДП на сучасным этапе. Акрамя таго, адбудуцца перавыбары старшыні партыі, яго намесьнікаў і кіроўных органаў.

Чакаецца, што дэлегатамі зьезду стануць 500 чалавек, якія прадстаўляюць усе рэгіёны Беларусі. Зараз, паводле Сяргея Гайдукевіча, па ўсёй краіне ідзе вылучэньне дэлегатаў на VIII зьезд партыі.