Недаразьвітым дэмакратыям ня месца ў ЭЗ :: Хартыя'97 :: Навiны

Пры далейшым існаваньні ў Беларусі, Украіне і Малдове “неразьвітых” дэмакратыяў, якія няздольныя забясьпечыць эканамічнае разьвіцьцё, цяжка думаць аб уступленьні гэтых краінаў у ЭЗ. Такую заяву зрабіў дырэктар дасьледніцкага Нямецкага таварыства замежнай палітыкі прафэсар Эбэрхард Зандшнайдэр на сустрэчы Зьвязу маладых экспэртаў па праблемах Усходняй Эўропы, якая адбылася ўчора ў Бэрліне.

Як паведамляе “Нямецкая хваля”, прафэсар лічыць, што пытаньне, дзе заканчваюцца межы Эўрапэйскага зьвязу, залежыць ад унутрыпалітычнай сытуацыі ў краінах-суседзях ЭЗ. На яго думку, пры далейшым існаваньні ў Беларусі, Украіне і Малдове “неразьвітых” дэмакратыяў, якія няздольныя забясьпечыць эканамічнае разьвіцьцё, цяжка думаць аб уступленьні гэтых краінаў у ЭЗ. І нават калі гэтым былым савецкім рэспублікам хутка ўдасца дасягнуць пазытыўных зрухаў, то іх можна будзе разглядаць як кандытатаў на ўступленьне ў ЭЗ не раней, чым праз 10 гадоў, лічыць Зандшнайдэр.

Як адзначыў экспэрт, на дадзены час паміж краінамі-чальцамі ЭЗ працягваецца дыскусія аб межах пашырэньня Эўразьвязу. Статус асаблівых суседзяў ЭЗ Украіны, Малдовы і Ўкраіны зьяўляецца нічым іншым як працягам традыцыйна багатага інструмэнтару супрацоўніцтва Эўрапэйскага зьвязу з суседнімі рэгіёнамі, лічыць дырэктар інстытута нямецкага таварыства замежнай палітыкі. У інтарэсах ЭЗ, каб межы новых краінаў-чальцоў не кантактавалі зь нестабільнымі рэгіёнамі. Як кажа Зандшнайдэр: “Адна з задачаў заключаецца ў тым, каб краіны на ўсходзе ЭЗ былі стабільнымі, каб дэстабілізуючы фактар не трапляў у ЭЗ”, перадае УНИАН.