Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Праца беларускага прадстаўніцтва амэрыканскае Рады па міжнародных дасьледаваньнях і абменах (IREX) спыняецца ў нашай краіне зь сёньняшняга дня. Такое рашэньне было прынятае беларускімі ўладамі некалькі месяцаў таму. Перад закрыцьцём арганізацыя, якая займалася падтрымкаю незалежнай прэсы і іншых элементаў грамадзянскай супольнасьці, была абвінавачаная ў стварэньні на тэрыторыі Беларусі шпіёнскай выведнай сеткі. Сёньня Менск пакідае амбасадар ЗША ў Беларусі Майкл Козак, у якога сышоў тэрмін паўнамоцтваў.
Як паведамляе Радыё Свабода, супрацоўнікі менскага прадстаўніцтва IREX працавалі па 12 гадзінаў у дзень, завяршаючы свае праекты і рыхтуючыся за закрыцьця офісу з 7 жніўня. Паралельна прадстаўніцтва IREX, якому Міністэрства замежных справаў дала палітычна матываваную адмову ў падаўжэньні рэгістрацыі, працягвае абскарджваць дзеяньні ўлады ў судовым парадку.
Кіраўнік менскага прадстаўніцтва IREX Боб Артэга пацьвердзіў, што яго офіс рыхтуецца да закрыцьця -- у адпаведнасьці з патрабаваньнямі МЗС РБ.
Ірына Аўчыньнікава, юрыст арганізацыі, кажа, што, нягледзячы на тое, што пададзеныя скаргі ў Вышэйшы Гаспадарчы Суд, арганізацыя спыняе сваю дзейнасьць ў Беларусі: “Мы сваю дзейнасьць з 7-га жніўня цалкам зварочваем, мы ня маем права нічога тут рабіць, акрамя як падрыхтоўкі да здачы дакумэнтаў у архіў. Так што мы ня будзем парушаць гэты парадак, не жадаем, каб да арганізацыі прымянялі якія-небудзь санкцыі”.
