За стадыён на могілках - байкот на Алімпіядзе :: Хартыя'97 :: Навiны

Юдэі Беларусі й міжнародныя габрэйскія арганізацыі "выказваюць вялікую заклапочанасць адносна працягу будаўніцтва футбольнага стадыёну на месцы старажытных габрэйскіх могілках у Городні". Пра гэта заявіў "Интерфаксу" ў чацьвер прэзыдэнт Юдэйскага рэлігійнага згуртаваньня ў Беларусі Юры Дорн. "На дадзены час прынятае рашэньне на ўзроўні шэрагу кангрэсмэнаў ЗША, якія ўваходзяць у камісію па захаваньні амэрыканскае спадчыны за мяжой, зьвернецца ў Міжнародны Алімпійскі камітэт з просьбай байкатаваць Беларусь на бліжэйшых Алімпійскіх гульнях, калі ня будзе спыненае будаўніцтва спартовага будынку на месцы старажытных габрэйскіх пахаванняў", - заявіў Дорн.

Паводле яго, у ИРОБ "лічаць недапушчальным будаўніцтва падмурку футбольнага стадыёну з надмагільных каменьняў і выкарыстаньне зямлі з могілак, у якім знаходзіліся косткі, для будаўнічых патрэбаў".

Дорн выказаў заклапочанасьць адносна таго, што "перамовы аб спыненьні будаўніцтва футбольнага стадыёну на месцы могілак, у якіх удзельнічалі кіраўніцтва Гарадзенскага раёну і галоўны равін Беларусі Сэндэр Урыцкі, ня далі станоўчых вынікаў".

"Адсутнасьць разуменьня з боку ініцыятараў будоўлі футбольнага стадыёну да праблемы захаваньня рэлігійных і гістарычных сьвятынь прычынілася таго, што шэраг міжнародных габрэйскіх арганізацыяў накіраваў у FIFA і UEFA патрабаваньні байкатаваць беларускіх футбалістаў на міжнароднай арэне", - паведаміў прадстаўнік юдэйскай супольнасьці Беларусі.