Дамоўленасьць аб эмісіі рубля – «прамежкавая» :: Хартыя'97 :: Навiны

Прамежкавымі назвалі ў Нацбанку Беларусі дамоўленасьці кіраўнікоў галоўных банкаў Расеі й Беларусі пра тое, што дзьве краіны могуць ажыцьцяўляць рублёвую эмісію прапарцыйна свайму аб’ёму ВУП у агульным аб’ёме “саюзнай дзяржавы”.

“Гэта пакуль праект Пагадненьня, да якога прыйшлі ў час абмеркаваньня кіраўнікі цэнтральных банкаў дзьвюх краінаў”, -- сказаў карэспандэнту РІА “Новости" прэс-сакратар Нацыянальнага Банку Беларусі Міхаіл Журавовіч і дадаў, што ВУП Беларусі складае 3,5 адсоткі ад ВУП Расеі.

Паводле яго, дакумэнт будзе абмяркоўвацца на паседжаньні беларуска-расейскай працоўнай групы, якую ачольваюць старшыня Нацбанку Беларусі Пётар Пракаповіч і віцэ-прэм’ер, міністар фінансаў Расеі Аляксей Кудрын, а затым у “саюзным урадзе”.

Паводле яго, Расея ў любым выпадку будзе кантраляваць працэс эмісіі валюты пасьля таго, як Пагадненьне аб увядзеньні расейскага рубля ў якасьці адзінага плацёжнага сродку набярэ моц з 1 студзеня 2005 году. “Ніхто ня дасьць бескантрольна праводзіць эмісію грошай, у любым выпадку гэта будзе кантралюемы працэс”, -- сказаў Журавовіч.

Журавовіч лічыць, што расейскі рубель можа стаць агульнай валютай па безнаяўных разьліках ужо з чацьвёртага кварталю сёлетнега году.

“Расейскі рубель пры гэтым застанецца замежнай валютай на тэрыторыі Беларусі”, -- сказаў прэс-сакратар Нацбанку.