Беларусь спадзяецца атрымаць лібійскі крэдыт, каб пагасіць пазыку «Газпрому» :: Хартыя'97 :: Навiны

Крэдыт у 120 млн. эўра намерваецца прадаставіць Беларусі Лібійскі арабскі замежны банк. Пра гэта ў суботу паведаміў беларускі тэлеканал ОНТ. Паводле яго, праект крэдытнага пагадненьня, якое заключаецца пад гарантыі беларускага ўраду, ужо ўхвалены на вышэйшым узроўні і гатовы да падпісаньня. Плянуецца, што крэдыт будзе заключаны тэрмінам на 5 гадоў пад 3,5% гадавых. Згодна папярэдніх дамоўленасьцяў, лібійскі банк «перавядзе адразу ўсю суму, прызначаную для фінансаваньня дзяржаўных выдаткаў заёмшчыка». Пры гэтым лібійскі бок прадастаўляе адтэрміноўку пагашэньня асноўнай пазыкі на 1 год.

«Крэдыт, хутчэй за ўсё, будзе накіраваны на пагашэньне запазычанасьці краіны перад ААТ «Газпром» за пастаўлены раней прыродны газ, якая ўтварылася на 1 студзеня 2003 году», — паведаміў ОНТ.

Нагадаем, што на прэс-канфэрэнцыі, што адбылася 1 жніўня для прадстаўнікоў расейскіх рэгіянальных СМІ, прэзыдэнт Беларусі Аляксандар Лукашэнка заявіў, што беларуская пазыка перад «Газпромом» складае 123 млн. даляраў, але «мы с ним рассчитаемся».