Здароўе дзяцей у Беларусі пагаршаецца з кожным годам :: Хартыя'97 :: Навiны

Здароўе дзяцей у Беларусі пагаршаецца з кожным годам, паведаміла на прэс-канфэрэнцыі галоўны навуковы супрацоўнік Навукова-дасьледчыцкага інстытута аховы мацярынства і дзяцінства Ірына Ваніловіч. “Дактары-пэдыятары ў паніцы ад таго стану здароўя дзяцей, якое назіраецца ў апошні час, -- падкрэсьліла адмысловец. -- У падлеткавым узросьце зь цяжкасьцю ўдаецца знайсьці абсалютна здаровага дзіцёнка”. На яе думку, гэтаму ёсьць шмат прычынаў, у тым ліку тыя нагрузкі, якія маюць дзеці ў школе, паведамляе БелаПАН.

Паводле выконваючай абавязкі загадчыцы аддзяленьнем гігіены дзяцей і падлеткаў Рэспубліканскага цэнтру гігіены, эпідэміялёгіі і грамадзкага здароўя Міністэрства аховы здароўя Іны Таракан, па выніках 2002 год паказчыкі захворваемасьці ў дзяцей да 14 гадоў упершыню ў жыцьці ўстаноўленым дыягназам пераўзышлі паказчыкі 1993 году на 34,6%, у падлеткаў - на 26,2%. У структуры захворваемасьці за мінулы год асноўнае месца займалі захворваньні органаў дыханьня (70,5%). Акрамя таго, павялічылася колькасьць дзяцей, якія адносяцца да спэцыяльнай мэдычнай групы па фізычным выхаваньні: у 2001 годзе - 2,1%, у 2002 годзе - 3,7%. З кожным годам, адзначыла адмысловец, пагаршаюцца вынікі абсьледаваньня асанкі і вастрыні зроку вучняў. На яго думку, пагаршэньне зьвязанае зь неадпаведнасьцю мэблі і асьвятленьня ў клясах санітарна-гігіенічным стандартам.