Пагадненьне аб увядзеньні адзінай валюты зноў ухваленае :: Хартыя'97 :: Навiны

Праект міжурадавага пагадненьня аб парадку ўвядзеньня адзінай валюты на тэрыторыі Расеі й Беларусі ў агуле ўхвалены. Пра гэта паведамілі ў прэс-службе Мінфіну РФ па выніках паседжаньня працоўнае групы па падрыхтоўцы пагадненьня, якое прайшло ўчора пад старшынствам віцэ-прэм’ера, міністра фінансаў РФ Аляксея Кудрына і старшыні ўправы Нацыянальнага банку Беларусі Пятра Пракаповіча, перадае агенцтва РІА “Новости”. На паседжаньні прынятае рашэньне да канцу жніўня завяршыць працу над праектам пагадненьня аб парадку ўрэгуляваньня ўзаемных патрабаваньняў і забавязкаў на выпадак выхаду Беларусі з дамовы аб выкарыстаньні расейскага рубля на сваёй тэрыторыі.

Было вырашана таксама, што міністэрствы фінансаў дзьвюх краінаў у 10 дзён правядуць перамовы па падрыхтоўцы да падпісаньня праекту пагадненьня па ўскосным падаткаабкладаньні і прапрацуюць іншыя пытаньні ў галіне падаткава-бюджэтнай палітыкі, зьвязаныя з увядзеньнем расейскага рубля ў Беларусі.

Незадоўга да паседжаньня працоўнай групы прэзыдэнт Расеі Ўладзімер Пуцін на нарадзе з чальцамі ўраду паведаміў, што ў бліжэйшы час павінна быць вызначаная дата яго сустрэчы з прэзыдэнтам Беларусі Аляксандрам Лукашэнкам, перадае агенцтва “Интерфакс”. “Мы падыйшлі да той рысы, калі трэба прымаць канчатковае рашэньне”, - заявіў Пуцін, кажучы аб праблеме ўвядзеньня адзінай валюты “саюзнай дзяржавы”.

Нагадаем, 1 ліпеня плянавалася ўвесьці ў Беларусі безнаўны расейскі рубель. Аднак Лукашэнка не падпісаў адпаведны ўказ. У Нацыянальным банку Беларусі патлумачылі такое рашэньне Лукашэнкі неабходнасьцю дадатковых кансультацыяў.

Увядзеньне паралельнага хаджэньня беларускага й расейскага рублёў у сыстэме безнаяўных разьлікаў Беларусі павінна было стаць першым этапам на шляху ўвядзеньня расейскагна рубля ў якасьці адзінага плацёжнага сродку на тэрыторыі саюзнай дзяржавы.

Наступным этапам павінна стаць жорсткая прывязка курсу беларускай грашовай адзінкі да расейскага рубля. Гэты працэс плянуецца завершыць да 1 студзеня 2004 году, заявіў паўгода таму кіраўнік управы Нацыянальнага банку Беларусі Пётар Пракаповіч. Ён таксама выказаў меркаваньне, што банкаўскія сыстэмы дзьвюх краінаў будуць гатовыя забясьпечыць увядзеньне расейскага рубля ў якасьці адзінага плацёжнага сродку з 1 студзеня 2005 году.