Вольга Захаранка просіць не чапаць праваабаронцаў :: Хартыя'97 :: Навiны

Жонка зьніклага ў 1999 годзе экс-міністра ўнутраных справаў Юрыя Захаранкі Вольга Захаранка, якая пражывае ў эміграцыі ў Нямеччыне, зьвярнулася 11 жніўня зь лістом да міністра юстыцыі Беларусі. Яна просіць адазваць зыск аб ліквідацыі праваабарончай арганізацыі "Прававая дапамога насельніцтву", кіраўнік якой зьяўляецца прадстаўніком яе сям’і на радзіме.

Вольга Захаранка піша ў лісьце:

"Спадар міністар! Нашая сям’я з трывогай даведалася пра тое, што ў вытворчасьці Менскага гарадзкога суда знаходзіцца грамадзянская справа аб ліквідацыі Грамадзкага аб’яднаньня "Прававая дапамога насельніцтву”. Інфармацыя пра тое, што дадзеная арганізацыя ліквідуецца, непакоіць нашу сям’ю ў сувязі з тым, што прадстаўнікі дадзенай арганізацыі аказвалі і аказваюць дапамогу нашай сям’і пасьля выкраданьня майго мужа і айца нашых дзяцей, экс-міністра МУС РБ Захаранкі Ю.М. Больш за тое, з тае прычыны, што нашая сям’я знаходзіцца за мяжой Рэспублікі Беларусь, кіраўнік ГА "Прававая дапамога насельніцтву" Алег Волчак зьяўляецца нашым прадстаўнікм на радзіме.

Нашую закляпочанасьць падзяляюць маці Юрыя Захаранкі і сем’і выкрадзеных Віктара Ганчара, Зьмітра Завадзкага і Анатоля Красоўскага.

Просім Вас адазваць гэты зыск аб ліквідацыі арганізацыі "Прававая дапамога насельніцтву".

Вольга Захаранка»