«Беларуськалію» пагражае фінансавая крыза :: Хартыя'97 :: Навiны

Грашовая запазычанасьць спажыўцоў прадукцыі РУП "ВА "Беларуськалій" за пастаўленыя калійныя ўгнаеньні для правядзеньня ў сёлетнім годзе вясновага і азімага севу складае больш за 31 млрд. рублёў, што пагражае прадпрыемству фінансавай крызай. Пра гэта "Интерфаксу" паведамілі на дадзеным прадпрыемстве.

Паводле суразмоўцаў агенцтва, рэспубліканскае ўнітарнае прадпрыемства (РУП) "ВА "Беларуськалій" выканала графік адгрузкі калійных угнаеньняў, зацьверджаны ва ўрадзе 26 сакавіка 2003 году. Спажыўцы атрымалі 350 тыс. тонаў угнаеньняў у дзейным рэчыве для правядзеньня вясновага севу, удакладнілі ў РУП "ВА "Беларуськалий".

У той самы час, адзначылі адмыслоўцы аб’яднаньня, "графікі пералічэньня грашовых сродкаў на закупку калійных угнаеньняў і пагашэньня запазычанасьці ў сакавіку-ліпені 2003 году ня выкананыя ". Асабліва вялікая запазычанасьць утварылася ў Менскай, Гарадзенскай, Берасьцейскай і Магілёўскай абласьцей, якія па стану на 5 жніўня 2003 году запазычылі ВА "Беларуськалий" адпаведна 8 986,9 млн.рублёў, 6 956,6 млн.рублёў, 5 464,0 млн.рублёў і 5 269,4 млн.рублёў.

У аб’яднаньні апасаюцца, што "невыкананьні забавязкаў па пералічэньні грошай за адгружаныя калійныя ўгнаеньні паставіць прадпрыемства ў цяжкое становішча”. Паводле суразмоўцаў агенцтва, адсутнасьць паступленьня грошай "прыводзіць да зрыву тэрмінаў разьлікаў за энэрганосьбіты, за грузаперавозкі з транспартнымі арганізацыямі і іншых неплатаў”. "Асабліва востра стаіць праблема фінансаваньня будаўніцтва новага Краснаслабодзкога рудніка для падтрыманьня рудной базы "Беларуськалія", - падкрэсьлілі ў аб’яднаньні.

Як стала вядома "Интерфаксу", кіраўніцтва канцэрну "Белнафтахім", улічваючы цяперашнюю сытуацыю ў РУП "ВА "Беларуськалій", зьвярнулася ва ўрад з просьбай забясьпечыць тэрміновае пералічэньне грашовых сродкаў за адгружаныя мінеральныя ўгнаеньні сельскай гаспадарцы.

Апрача таго, улічваючы высокі ўзровень запазычанасьці калгасаў і саўгасаў за пастаўленыя ім калійныя ўгнаеньні, кіраўніцтва канцэрну просіць урад "аказаць садзеяньне ў правядзеньні РУП "ВА "Беларуськалій" узаемаразьліку па плаце ў рэспубліканскі фонд падтрымкі вытворцаў сельскагаспадарчай прадукцыі, харчаваньня і аграрнай навукі і абласны фонд стабілізацыі эканомікі вытворцаў сельскагаспадарчай прадукцыі і харчаваньня на суму запазычанасьці".

РУП "ВА "Беларуськалій" належыць 16% сусьветных вытворчых магутнасьцяў і 13% сусьветнага экспарту калійных угнаеньняў. Аб’яднаньне займае трэцяе месца ў сьвеце пасьля вытворцаў Канады і Расеі.

У 2002 годзе аб’ём прадукцыі, выпускаемай аб’яднаньнем, склаў 4% агульнага аб’ёму прамысловай вытворчасьці дзяржавы. Яшчэ вышэй доля прадукцыі аб’яднаньня ў экспарце рэспублікі - 16%, а ў паступленьні валютнай выручкі - 10,4%.
Прадпрыемства зьяўляецца горадаўтваральным і забясьпечвае працай практычна кожнага пятага жыхара Салігорску (19 725 человек), адлічэньні ў бюджэт гораду складаюць больш за 90%.

Здабытая руда перапрацоўваецца на чатырох узбагачальных фабрыках, зь якіх маюць флятацыйныя схемы ўзбагачэньня руды, а чацьвёртая - галургічную. Аб’яднаньне вырабляе: калій хлярысты дробнакрысталічны, калій хлярысты грануляваны, соль калійную зьмешаную, натрый хлярысты тэхнічны, соль павараную харчовую і для жывёлагадоўлі, вадкі расол, солеблёкі для галякамэр.